Қоғам • 20 Наурыз, 2024

Ұлт болып ұйысу жолында зиялы қауымның атқарар рөлі бөлек - Жанарбек Әшімжан

69 рет
көрсетілді
5 мин
оқу үшін

15 наурызда Мемлекет басшысының төрағалығымен Ұлттық құрылтайдың үшінші отырысы өтті. Құрылтай барысында Қасым-Жомарт Тоқаев өзекті әлеуметтік мәселелерді көтеріп, елдегі зиялы қауым өкілдерін ауызбіршілікке шақырған еді. Осы орайда Жанарбек Әшімжан бастаған бір топ депутат үндеу жасады, деп хабарлайды Egemen.kz.

Ұлт болып ұйысу жолында зиялы қауымның атқарар рөлі бөлек - Жанарбек Әшімжан

Фото: parlam.kz

«Ұлт болып ұйысу, жұрт болып жұмылу жолында зиялы қауым өкілдерінің атқарар рөлі бөлек. Күні кеше Атырауда өткен Ұлттық құрылтайда Мемлекет басшысы Қасым-Жомарт Тоқаев «Ынтымағы жарасқан, ортақ мақсатқа ұйысқан ұлт ешқашан ұтылмайды. Елдің тұтастығы зиялы қауымның бірлігінен басталады. Ел ағалары ауызбіршілікті және ұрпаққа өнегелі болуы керек», деп ұлт зиялыларына өз қайырылуын жасады. Сол құрылтай төрінде мені қоғамымызда айрықша орны бар, сөз бастаса халықты ұйытар шешен, көш бастаса елді ертер көсем, руханият әлеміндегі әйгілі тұлғалардың бүгінгі кескін-келбеті мен жауапкершілігі қатты ойландырды. Осы орайда «Қазақ оқығанын сыйлайды, соңынан ереді. Қазақты тура жолға бастайтыны да, адастыратыны да оқығаны» деген Жүсіпбек Аймауытовтың сөзі ойға оралады. Қай дәуірде де, қандай тарихи кезеңде де қоғамның негізгі қозғаушы күші – зиялылар!», деп сөзін бастады Жанарбек Әшімжан.

Оның айтуынша, кешегі Алтын Орда мен бүгінгі Ақ Ордаға дейін қазақ елінің жүріп өткен күнгей-теріскейлі тарихында қара халыққа жарық сыйлап, жол нұсқаған, үмітін үкілеп, жігер берген тұлғалар аз емес.

«Расында, Майқы бидің «Бетеге кетсе – бел қалар, бектер кетсе – ел қалар, бірлігің кетсе – нең қалар» деген нақылы дәл бүгінгі таңда тіпті өміршең болып тұр. Ал есімі елге мәшһүр бүгінгі кейбір тұлғаларымыз, ақсақалдарымыз, тарихшыларымыз, жазушыларымыз ай-күннің аманында болары болып, бояуы сіңген түрлі оқиғалар туралы айтысып, тартысып, Алаш көсемдері мен кеңес қайраткерлерін қағыстырып, қыл аяғы Шыңғыс ханның тегіне таласып өспейтін елдің баласындай өнбейтін дауды қуып, «өлетұғын тай үшін, көшетұғын сай үшін» бірінің қолы бірінің жағасында жүрген жағдайларды ақпарат құралдары мен әдеуметтік желілерде аз көріп жүрген жоқпыз. Президент соны меңзесе керек», деді депутат.

Бұл ретте Жанарбек Әшімжан әр тұлғаның өз биігі бар екенін айтып, бір тұлғаны көтеру арқылы екінші тұлғаға көлеңке түсірудің керегі жоқ екенін тілге тиек етті.

«Тұрар Рысқұлов пен Сұлтанбек Қожановты, Сәкен Сейфуллин мен Алашорданы, Мағжан Жұмабаев пен Сәбит Мұқановты, Дінмұхамед Қонаев пен Жұмабек Тәшеновті бір-біріне қарсы қойып, елдің ішін алатайдай бүлдіріп, бөліп-жару кімге қажет? Олардың бағы мен сорын, бары мен жоғын жарыстырғаннан бүгінгі ұрпаққа қандай үлгі? Қандай өнеге? Баррикаданың қай қапталында болса да қазақ елінің тәуелсіздігі жолында бармағы шайнауда, басы айдауда кеткен тұлғалардың бәрі өз алдына бір-бір асқар тау! Әрқайсының өз тағдыры бар. Өз сүйініші, өз күйініші болды. Олардың күрес түрлері әртүрлі болғанмен, түпкі мақсат бір еді. Бәрі ұлттық мұраттар жолында, қазақтың хақы үшін күресте өмірлерін сарп етті. «Басына ас құйып, сабына қарауыл қойған» заманда ұлт болып ұйысып, жұрт болып жұмылуды көкседі олар», деп спикер сөзін жалғастырды.

Ол өз сөзінде ел жақсылары бір-бірінен алыстамай, бір жұдырықтай жұмылып, қазақтың ұлттық мұраттарын дәріптейтін заман туғанын айтты. Жанарбек Әшімжанның пайымынша, Мемлекет басшысы құрылтай барысында айтқан өнегелі сөздер ел ағалары үшін ұран болуы қажет.

«Президенттің Атырау алабында айтқан «Елімізде көзі ашық, көкірегі ояу, білімді жастар көп! Олардың бойына асыл қасиеттерді сіңіруіміз қажет. Мен зиялы қауым өкілдерінің бір-біріне әрдайым тілектес болғанын қалаймын. Өзара жанашыр болу – елге жанашыр болу деген сөз. Ұсақ-түйек әңгімені қойып, қазақты бөліп-жармай, жалпыұлттық деңгейде ойлауға ұмтылайық!» деген жүрекжарды тілегін байтақ қазақ даласындағы көш бастаған ел ағалары ұран секілді қабылдаса деген ниетімді жеткізгім келеді», деді депутат.

Сөз соңында Жанарбек Әшімжан қазақ халқы тағдыршешті сәттерде Абайдың дана сөздеріне жүгініп отырғанын еске салды.

«Ұлт зиялылары ұлы ойшылдың «Біріңді қазақ, бірің дос, көрмесең, істің бәрі – бос» деген сөзін асқан жауапкершілікпен сезітнетін сәт келді!», деп қорытындылады Ж.Әшімжан.