Қоғам • 21 Наурыз, 2024

Қазақтың келіндері-ай!

41 рет
көрсетілді
5 мин
оқу үшін

Қарағандыдағы өзге этнос өкілдері де Ұлыстың ұлы күнін жатсынбайды, қуана қарсы алады. Наурызнаманың онкүндігі басталғалы бері көбі түрлі іс-шарада төбе көрсетіп жүр. Солардың қатарындағы Теміртау қаласы іскер әйелдер қауымдастығының төрағасы Наталья Арыстанова туралы ерекше айтуға болады. Қазаққа келін болып түскен Наталья бауырсақты да, наурызкөжені де енесі үйреткен мәзірімен өзі дайындайды.

Қазақтың келіндері-ай!

Қазақы дәстүр-ғұрыпты бойына сіңіріп алған Натальяны Теміртау қаласының жұртшы­лығы жақсы таниды. Наташа алғашқыда қаладағы «Бидай-Нан» кәсіпорны дүкендерінде сатушы болып, 2005 жылы жеке кәсіпкерлікке ден қойды. Оған дейін Қытай мен екі ортада сан қатынап, тауар тасыды. Қазақ тілін еркін біл­гені кәдеге жарап, Астанадағы Л.Гуми­лев атындағы университеттің эко­­но­­ми­ка фа­куль­тетін де сырттай оқып бітір­­ді. Білімі мен тәжірибесі толыс­­­қан ол ұлттық үлгідегі төсек-орын жаб­дық­та­рын тігетін цех ашып, бүгінде 15 адамды жұмыспен қамтып отыр.

Наташа үшін Наурыз мейра­мының орны ерекше. Асыға күтеді. Неге десеңіз, былтыр «Даму» бағдар­лама­сымен алған несиесіне «Арна» дүкенін ашты. Дүкеннің ашылуын да Наурыз мерекесіне орай ұйымдас­тырған көрінеді. Көпқабатты үйдің бірінші қабатын тұтас алып жатқан бұл сауда нүктесінде 25 адам нәпақасын та­уып отыр. Тіл білмегендерді тұтыну­шы­лар­мен қазақша сөйлесуге өзі үйретіп жүр.

«Былтыр көп жылдан бері арман­даған «Арна» атты дүке­німізді Наурыз мерекесіне орай аштық. Есік алдына үстелдер қойып, қала жұртшылығына ыстық палау мен шай, тәтті-дәм­ділерді тегін ұсындық. Берекелі ас – наурыз­көжені де тараттық. Жалпы, өзім ырым­шылмын. Былтырғы Наурыз осын­дай жақсылығымен, берекесімен келді. Биыл да отбасымызбен, қызмет­керлерімізбен жақсылап атап өтеміз. Өйткені бұл мереке­нің берекесі мол. Жылды мол­шылықпен бастасаң, әрі қарай да әр күнің тоқ болады деген ішкі түйсігімде ой бар», дейді кәсіпкер келіншек.

Наташа үнемі қайырымдылық ак­ция­ларына қатысады. Жомарт­тығымен үлгі. Мысалы, жылда «Мек­тепке жол» акциясына атсалысып, қаладағы Қарттар үйі мен Дағдарыс орталығынан қолдан келген көмегін аямайды. Оған қоса былтыр қыста суықтан тоңған теміртаулық 60 отба­сыға жылы киім таратып бергені бар. Тіпті бір кездері өзімен бірге сатушы болып істеген орыстың жетім қызы Кристинаны жолдасы Нұрлыбек екеуі той жасап, қолдан ұзатқанын да адам­гер­шіліктің үлкен үлгісіне жат­қызуға болады.

Қазақтың салт-дәстүріне жетік Натальяны теміртаулықтар құрметтеп, сәбилерін қырқынан шығартып, бесікке салғызып, тұсауын кестіреді екен. Былтыр орыс жігітіне тұрмысқа шыққан құрбысы Гүлжанаттың сәбиі Давидке де осындай жоралғы жасаған. Осы уақытқа дейін 24 ұл баланы қырқынан шыға­рып­ты. Қырқынан шығару­дың жөн-жоралғысын кей­бір за­мандастарының әлі білмейті­ніне қынжылатынын да айтып қал­ды.

Жолдасы Нұрлыбек екеуінің Лаура мен Жангелді есімді ұл-қызы бар. Туғанынан бесікке бөлеп өсірген. «Бесікке бөлеу – нағыз тазалық қой. Шүкір, одан балаларым кем болған жоқ», дейді кейіпкеріміздің өзі. Рас, екі баласы да жоғары білімді, IT сала­сының білікті мамандары. Қыздары Лаура Астана қаласындағы осындай кәсіпорынның бас директоры болса, Жангелді IT университетінің магис­тратурасында оқиды. Ал отағасы Нұрлыбек «Алаутрансгаздың» апаттан құтқару қызметінде жұмыс істеп, қазір қалаға газ тарту мәселелерімен шұғыл­данып жүр. Бұл шаруаға еліміз­дің түкпір-түкпірінен, әсіресе өздерінің туған жері Ақтөбеден тәжірибелі мамандар ағы­лып келіп жатыр. Оларға қонақжай Арыстановтардың есігі қа­шан­да ашық. Алыс­тан ат арытқан меймандар Натальяның өзі айналдырып, тұздаған қазы-қар­тасын сүйсіне жеп, қай­мақ қатқан күрең шайын қанып ішіп, өз үйлеріне жүргендей болады. Әрине, мұның бәрі қазақтың келісті келіні  болған Наташаның кең пейілінен.

Жолдасы Нұрлыбек жас келінді Ақтөбедегі Шалқарға алып бар­ғанда ата-енесі Орын­басар мен Алдан жатырқамай, жатсынбай бауырына басып, ақ орамалын тағып, дүрілдетіп той жасап бе­реді. Содан ауылда тұрып, ененің мектебінен өтеді. «Қазір енемнің ең сүйікті келінімін», деп марқаяды өзі. Атасының атын айтуға келгенде қысылып, әрең дегенде барып, «заместительдің аудармасы ғой» дегенде біз «үлкенді сыйлаған ізетіңіз қандай» деп таңырқап қалдық.

Наташаның биылғы Нау­рыз ме­ре­­­кесіне дайындығы қызу. Үлкен дас­тарқан жа­йып, ұлттық киім киіп үйін­де, дүкені мен тігін цехын­да да атап өтеді. Наурызкөжені өзі үйі­нен да­йын­дайды. Мұны да енесі­нен үйрен­ген. Жұмы­сын­дағылар Наташа­ның әзірлеген бауырсағын, көжесін сүй­сініп жеп алады. Қазір кәсіп­кер келін­шек мерекедегі дастарқан­ның қамы­мен жүгіріп жүр.

 

Қарағанды облысы 

Соңғы жаңалықтар

Күзгі қомырған

Мирас • Кеше

Иткөйлек

Оқиға • Кеше

«Хат қоржын»

Егемен Қазақстан • Кеше

Жастар белсенділік танытты

«Таза Қазақстан» • Кеше