Қоғам • 27 Наурыз, 2024

Өңірлерде су тасқынына қарсы іс-шаралар белсенді жалғасып жатыр

101 рет
көрсетілді
2 мин
оқу үшін

Ауа температурасының күрт жылынуы және қардың тез еруіне байланысты еліміздің жекелеген өңірлерінде су тасқыны жағдайы күрделене түсті. Ең күрделі жағдай Ақтөбе және Қостанай облыстарында байқалды. Қалыптасқан су тасқыны жағдайына байланысты елімізде ТЖМ мен өңірлерде жедел штабтар жұмыс істеп жатыр. Бұл туралы Төтенше жағдайлар министрлігінің баспасөз қызметі мәлім қылды, деп хабарлайды Egemen.kz.

Өңірлерде су тасқынына қарсы іс-шаралар белсенді жалғасып жатыр

Фото: ҚР ТЖМ

11 өңірде әкімдіктер мен ТЖД өкілдерінің кезекшілігі ұйымдастырылды. Су айдындары мен су тасқыны жағдайына мониторинг жүргізу бойынша жұмыстар жалғасып жатыр. Жедел желі телефоны іске қосылды: ТЖМ 8 717 2 70 41 14, Ақтөбе облысы ТЖД 8 713 2 54 86 57, Батыс Қазақстан облысы ТЖД  8 711 2 55 40 88.

Еріген қар суымен күресу үшін Ақтөбе және Қостанай облыстарына Маңғыстау, Қызылорда облыстары мен 52859, 20982 әскери бөлімдерінен 220-ға жуық жеке құрам мен 25-тен астам техникадан қосымша күштер мен құралдар жіберілді.

Авариялық-құтқару жұмыстарына барлығы 1,5 мыңға жуық адам, 500-ден астам техника, 200-ге жуық бірлік су айдау және жүзу құралы жұмылдырылды.

gov.kz

ТЖМ мен әкімдіктердің жұмылдырылған күштері мен құралдары 320 мыңнан астам текше метр су алынып, инертті материалдар салынған 7 мыңнан астам қап төселген. Ең қауіпті учаскелерде нығайту жұмыстары жүргізіліп жатыр. 

gov.kz

Ақтөбе облысындағы Шұбарқұдық ауылында су басқан 5 жеке тұрғын үйден, 34 аула аумағынан суды шығару жұмыстары жалғасып жатыр. Жалпы облыс бойынша су басқан үйлер мен аула аумақтарынан 51 мыңнан астам текше метр еріген қар суы алынып, инертті материалдар салынған 7,9  мыңнан астам қап төселді. 543 текше метр қар шығарылған. 

Қостанай облысының Қостанай, Арқалық қалаларында, Амангелді және Жангелді аудандарында еріген қар суын алу жұмыстары жүргізіліп жатыр. Арқалық қаласында 20 аула аумағы, оның ішінде 12 жеке тұрғын үй су астында қалды. Үздіксіз жүргізілген су алу жұмыстарының нәтижесінде Арқалық қаласының тұрғын үйлерінен су толығымен шығарылды. Барлығы 6848 текше метр су алынды. Елді мекендерді су басу қаупі жоқ. Қазіргі уақытта жағдай тұрақты.

Су тасқынына қарсы іс-шаралар жалғасып жатыр.

gov.kz