Теннис • 01 Сәуір, 2024

«Мастерс» мәреге жетті

34 рет
көрсетілді
2 мин
оқу үшін

Қазақстанның ең үздік тен­нисшісі Елена Ры­бакина АҚШ-тың Майами қа­ласында өт­кен жүл­де қоры 8 995 555 дол­­ларды құраған «Мас­терс» тур­ни­рінде былтырғы нә­ти­жесін қайта­лады.

«Мастерс» мәреге жетті

Алғашқы айналымда бос болған Елена Рыбакина (әлемнің №4 ракеткасы) екінші кезеңде даниялық Клара Таусонды (№91) тізе бүктірді – 3:6, 7:5, 6:4. Одан кейін америкалық Тэйлор Таундсеннен (№72) басым түсті – 6:3, 6:7, 6:4. Төртінші кезеңде Мэдисон Кизді (№18) қапы қалдырды – 6:3, 7:5. Ширек финалда ол грекиялық Мария Саккариге (№9) сан соқтырды – 7:5, 6:7, 6:4. Жартылай финалда отандасымыз кезінде әлемдік рейтингте көш бастаған Беларусьтің беткеұстары Вик­тория Азаренкомен (№32) шеберлік байқасты. Бірінші сет Рыбакинаның пайдасына шешілгенімен, екіншісінде біздің спортшы «баранка» ұстады. Десек те Еленаның жүйесі сын сағатта сыр бермеді. Бәсеке тай-брейкке дейін ұласқанымен, ол жеңісті қарсыласының уысынан жұлып алды – 6:4, 0:6, 7:6.

Финалда жерлесіміз америкалық Даниэль Коллинзбен күш сынасты. Рыбакинаның WTA тізімінде 53-орында тұрған 30 жастағы теннисшіні ұтатынына күмәнданғандар кемде-кем еді. Бірақ бұл бәсекеде Коллинз­дің бағы жанды. Есеп – 7:5, 6:3. Был­тыр да Елена Майамиде ақтық сынға дейін алқынбай жет­­кенімен, шешуі тұста чехиялық Петра Кви­товаға жол берген еді.

Өзге теннисшілеріміз жайында айтар болсақ, испаниялық Кристина Бучу (№74), ресейлік Людмила Самсонова (№15), бель­гиялық Грет Миннен (№79) және украиналық Ангелина Калининаны (№36) қапы қалдырған Юлия Пу­тинцева (№68) ширек финалда Вик­тория Азаренкодан айласын асыра алмады. Ал Александр Шевченко (№58) мен Александр Бублик (№18) екінші айналымда сүрінді.