Облыстық ТЖД төтенше жағдайларды жою басқармасының бастығы, азаматтық қорғау подполковнигі Жандос Досымов бастаған 31 адамдық құтқару жасағы, 6 техника, 10 мотопомпа, 2 қайық 27 наурызда Қостанай облысындағы Амангелді ауданына жетіп, жұмысты бастап кетті. Әуелгіде олар Амангелді ауылындағы Абай, Палуан, Боданов көшелеріндегі еріген қар суын тартты.
«Келесі күні біздің жігіттер Амангелді ауылынан 9 шақырым жердегі Шынтас фазендасынан 5 адамды құтқарып, оларды қауіпсіз жерге шығарды. 10 мың текше метр су тартты. Тәуліктік кезекшілік ұйымдастырылды», дейді облыстық ТЖД «ӨСжАҚЖҚ» РММ бастығының орынбасары Бауыржан Оспанов.
Қызылордалық құтқарушылар бүгінге дейін мотопомпалар көмегімен 22 398 текше метр су тартып, 25 адамды құтқарып қалыпты. Жайылған сумен алысып жүріп, «Дәулет» шаруа қожалығының жүзден аса малын қауіпсіз аймаққа шығарды. Деңгейі күрт көтерілген Жалдама өзенінің жағасын нығайтыпты. Электр жүйесінің мамандарына су тасқынынан зақымдалған бағаналарын қалыпқа келтіруге көмек берген.
Айтып келмейтін апат кезінде кәсіби біліктілік танытқан құтқарушыларға қостанайлықтар алғыс айтып жатыр. Ал 1 сәуірде облыстық төтенше жағдайлар департаменті құтқару жасағының 35 адамы мен 3 техникасы, 10 мотопомпасы, 2 қайық Атыраудағы ағайынға көмекке аттанды.
Қызылорда
