Депутат Мұқаш Ескендіров мемлекеттік сатып алу рәсімдеріне байланысты ескертулер өңірлерде жиі қойылатын сұрақтардың бірі екенін жасырмады.
«Бұл мәселе кәсіпкерлер мен әкімшілерді алаңдатады, ал шешім болмаған жағдайда адамдардың өмір сапасына тікелей әсер етеді. Ұзақ құрылыс, сәтсіз конкурстар, ұзақ және шулы сот процестері ауруханаларды күрделі жөндеуге, жаңа мектеп салуға, әлеуметтік қызметтер көрсетуге мүмкіндік бермейді. Кейде, уақтылы және сапасыз өткізілген конкурстар маңызды инфрақұрылым нысандарының жұмысын тежейді», деп түсіндірді Мұқаш Ескендіров.
Айта кетейік, «Мемлекеттік сатып алу туралы» жаңа заң жобасы Мемлекет басшысының мемлекеттік сатып алудың сапалы жаңа жүйесін құру жөніндегі тапсырмасын іске асыру мақсатымен әзірленді.
Жобаның маңызды жаңашылдықтары:
- конкурстардың бағалық емес критерийлерін көздейтін сатып алынатын тауарлардың сапасын арттыру жөніндегі нормалар;
- мемлекеттік ақпараттық жүйелердің объективті деректеріне негізделген өнім берушілердің рейтингін бағалаудағы тәсілдерді өзгерту;
- жеткізушілер мен әкімшілердің жауапкершілігін арттыру;
- шағымдану рәсіміне өзгерістер енгізу;
- мемлекеттік сатып алуды өткізу мерзімін екі есеге қысқарту;
- отандық тауар өндірушілерді қолдау және мемлекеттік сатып алуларда жергілікті қамтуды арттыру бойынша айтарлықтай шаралар пакеті.
Одан бөлек әлеуметтік, экономикалық және экологиялық аспектілерді ескере отырып, тауарларды, жұмыстарды, көрсетілетін қызметтерді сатып алуға негізделген «Тұрақты мемлекеттік сатып алу» институтын енгізу ұсынылды.
«Тұрақты мемлекеттік сатып алуды» енгізу ақшаны оңтайлы және тиімді жұмсауға, отандық өндірушілерді, сондай-ақ мүгедек адамдарды қолдауға, қоршаған ортаны қорғауға бағытталған.
Сондай-ақ депутаттар жергілікті қамту үлесін арттыруға бағытталған қосымша нормаларды ұсынды. Ұсыныстардың бірі бойынша оффтейк келісімшарттары бойынша өндірілетін өнімді бір көзден сатып алуға болады.
Өңірлік жеткізушілерді қолдау мақсатында депутаттар қосалқы мердігерлік жұмыстар көлеміне 30% лимит белгілеуді ұсынды.
Заң жобасы бойынша жұмыс екінші оқылымға дейін жалғасады.
