Фото: jambylinfo.kz
Еліміздің жеті өңіріндегі қарғын судан зардап шеккен ағайынға қолдау білдіру мақсатында Жамбыл облысынан гуманитарлық жүк артқан 17 жүк көлігі жолға шықты. Дерекке жүгінсек, әр көлік 20 тоннадан жүк артқан екен. Жүк көліктеріне киім-кешек, азық-түліктен бастап, өзге де ең қажетті заттар тиелген. Бұл – өңір тұрғындарының көмегі.
«Қарғын судан зардап шеккен өңірлерге жамбылдықтар тарапынан көрсетілетін гуманитарлық көмекті жіберуді жалғастырып жатырмыз. Мұндай қиын-қыстау кезеңде бір жеңнен қол, бір жағадан бас шығарудың маңызды екені түсінікті. Елдік мәселені өңір басшысы Ербол Қарашөкеев тікелей өз бақылауына алып отыр. Гуманитарлық көмек санатына азық-түлік тауарлары, киім-кешек және өзге аса қажетті заттар енген. Шалғайдағы ағайынға қиын күндерде қолдау көрсетуге ниет білдіріп отырған әрбір азаматқа алғыстан басқа айтарымыз жоқ. Бұл – су тасқынынан зардап шеккен өңірлердегі тұрғындарға жолдаған Жамбыл облысы халқының гуманитарлық көмегі. Облыс әкімдігі жүк көліктерінің шығынын мойнына алып, ұйымдастыру жұмыстарына ғана атсалысып отырғанын айта кеткен жөн», дейді өңір басшысының орынбасары Әбілхайыр Тамабек.
Ә.Тамабектің айтуынша, гуманитарлық көмек межеленген уақытта Ақмола, Солтүстік Қазақстан, Қостанай, Ақтөбе, Батыс Қазақстан, Қарағанды облыстарына жеткізілмек.
«Жүк көліктерінің қауіпсіздігін мемлекеттік автоинспекторлар қадағалайды. Гуманитарлық көмекті бірінші кезекте өңір халқының сын сағаттағы қолдауы мен жанашырлығы деп түсінген ләзім», дейді Ә.Тамабек.
Өңір тұрғындары су тасқынынан зардап шеккен өңірлерге қолдау көрсету мақсатында әлі де болса жұдырықтай жұмылып, біраз істі тындыратын секілді. Өйткені бұл жұмысқа еріктілер де кірісіп кеткенін көріп отырмыз. Бұған дейін әулиеаталық волонтерлерден құралған топ гуманитарлық көмекті Ақтөбе қаласына жеткізіп берген еді.
Жамбыл облысы
