Дін мен дәстүр – егіз ұғым

Дін мен дәстүр. Қазақтың болмысымен біте қайнасқан бұл екі қастерлі ұғым қадым замандағы қилы зауалдарға қарсы тұрған, халықты бірлікке, тұтастық пен татулыққа бағыттаған рухани құндылық. Алла тағала қасиетті Құранның Ағраф сүресінде: «Ғафу жолын ұста, ғұрыппен әмір ет...» депті. Таяуда Астана қаласындағы Ұлттық сурет галереясында ҚМДБ-ның ұйымдастыруымен «Дін мен дәстүр – егіз ұғым» атты рухани кеш өтті. Қасиетті Құран сүрелерімен ашылған кешті Қазақстан мұсылмандары діни басқармасының төрағасы, Бас мүфти Ержан қажы Малғажыұлы бастап, биылғы жылда атқарылған іс-шараларға кеңінен тоқталды. «Дін мен дәстүр жылы» деп жарияланған биылғы жылдың қорытынды кешіне қоғам қайраткерлері, парламент депутаттары, облыс имамдары мен дінтанушы ғалымдар, зиялы қауым өкілдері қатысты. Қазір ұлттық табиғатымызбен сабақтас асыл дүниелерімізді, жауһарларымызды жарыққа шығару, үзілгенімізді жалғап, жоғалт­­қанымызды түгендеу бас­ты бағыт болып тұр. Сол арқылы қазақ­тың толыққанды ұлтқа, Алаш­тың іргелі елге айналуы үшін қолдан келгенше үлес қосу болып табылады. Бағдарлама аясында, бейне таспа, терме, қойылым, айтыс, дәстүрлі ән мен күй рәсімдері өтті. Әр кезеңнің өз белесі мен елеулі оқиғалары болатындай, діни сала үшін де 2014 жыл тарихи оқиғаларға толы болды. Қысқаша тоқталар болсақ, биылғы жылдың қазан айында Қазақстан мұсылмандары діни басқармасы Астанаға қоныс аударды. Жыл басында дін саласындағы уәкілетті орган мен ҚМБД-ның арасында өзара ынтымақтастық туралы келісімге қол қойылды. Діни басқарманың 2020 жылға дейінгі қызметін дамыту тұжырымдамасы қабылданған. Египет пен Түркия­ның діни басқармаларымен, Мәс­кеу қаласындағы Ислам универ­ситетімен жасалған уағдаластың шеңберінде еліміздің 64 имамы атал­ған елдерде білімін жетілдіру үстінде екен. Республика бойынша мешіттер жанындағы сауат ашу курстарында 22 592 адам діни білім алыпты. Дін қызметкерлері 1млн. 168 мыңнан астам тұрғын­дарымызға дін жайында халық­тың көкейінде жүрген сауалдарына жауап берген. Өзекті діни мәселелер бойынша, соның ішінде «тәкфіршілер», «хижрат», «жиһад» ұғымдары және қазіргі заман туралы 23 пәтуа шығарылыпты. Сондай-ақ, Қасиетті Рамазан айында 17 280 тұрмысы төмен отбасына қайырымдылық көмек, 480 рухани шаралар өткізіліпті. Кеш соңында Бас мүфти Ержан қажы Малғажыұлы ерен еңбегімен танылып, осы саланың өркендеуіне елеулі үлес қосқан азаматтарға «Алғыс хат» табыс­тап, арнайы марапаттау рәсімін өткізді. Қысқасы, мұндай игілікті іс-шаралар болашақта да жалғасын таба бермек. Раушан ТӘУІРХАНҚЫЗЫ, журналист.