Бейбітшілік туы берік болсын

Мен әскери қызметкер және бейбітшілікті сақтау ісіне 43 жыл өмірімді арнаған адам ретінде елімізде ең алдымен бейбітшілік, тыныштық болғанын қалаймын. Оны сақтау үшін салиқалы саясат, өзгелерге өз сөзінің дұрысты­­­ғын мойындата алатын білік­ті де білімді дипломатия керек. Құдайға шүкір, қазір біздің ондай әлеуетіміз бар. Президент Нұрсұлтан Назарбаевтың басқаруымен еліміз өзін беделді биікке көтере алды. Сонымен бірге, Елбасы ішкі келісім мен төзімділіктің де маңызы зор екендігін ешқашан естен шығарған емес. Осы орайда, 2015 жылды «Қазақстан халқы Ассамблеясының жылы» деп жариялағанын мен шын ниетіммен қолдаймын. Ішкі келісімді сақтауда Ассамблеяның рөлі зор болып келді, алдағы уақытта да солай бола берері сөзсіз. Жалпы, 2015 жыл Қазақстан үшін маңызы өте терең мерей­­тойлық жыл болғалы тұр. Соның ішінде бұл жылы Конс­ти­туцияның – 20, Қазақ хан­дығының – 550 және Ұлы Же­ңіс­тің 70 жылдығы аталып өтпек. Осы мерей­тойлардың бәрі де өздеріне лайық мазмұнда атап өтілуі керек. Бізде қазір «Әскери-ғылы­ми академия» атты қоғамдық бірлес­тік құрылды. Мен соның прези­денті болып сайландым. Міне, осы бірлестік те осынау тари­хи оқиға­ларды атап өтуге өзінің лайық­ты үлесін қосуға дайындалып жатыр. Соның ішінде жастарды патриотизм рухында тәрбиелеу істеріне белсенді түрде қатыспақпыз. Әсіресе, Қазақ хандығының 550 жылдығы мерейтойына орай жастарымызға тарихтың терең қатпарларынан білікті дәрістер мен әңгімелер өткізуді көздеп отырмыз. Ұлы Жеңістің 70 жылдығы да біздің назарымыздан тыс қалмайды. Оның маңызын да бүгінгі жастарға білдіріп отыру – біздің парызымыз. Мәжіліс депутаты ретінде айтарым, қазір бізге еліміздің экономикалық әлеуетін арттыра түсуді көздейтін және айтулы даталарды лайықты атап өтуге мұрсат беретін заң жобалары түсіп жатыр. Міне, соларды біліктілікпен талқылап, мемлекетіміз бен хал­қы­мызға барынша тиімді болатын тұстарын баса көрсете отырып қабылдауға белсене атсалысуымыз керек. Кез келген заң жобасында олқылықтар болмай тұрмайды, біздің міндетіміз – солардың өтіп кетпеуіне жіті назар аударып, жетім­сіз жақтарын ширатуға атсалы­су. Бұл міндетті атқаруға Мәжі­ліс депутаттарының әлеуеті молынан жетеді. Осы уақытқа дейін қабылдаған заңдарымыздың еліміздің эконо­микасын көтеруде зор қызмет етке­нін кешегі индустрияландыру бес жылдығының табысты аяқтал­ғанынан көріп отырмыз. Қанша­ма жаңа кәсіпорындар, мыңда­ған жаңа жұмыс орындары ашыл­ды. Солардың бәріне заңнама­лық тұрғыдан мүмкіндік берген біз қабылдаған заңдар екенін ойла­ғанда, еліміз үшін жүрегімізді мақта­ныш сезімі де кернеп кетеді. Халық­тың әлеуметтік тұрғыдан қорға­луына қолымыздан келген мүмкін­дігіміздің бәрін жасаудамыз. Жаңа жылда да осындай қарқыннан көрінеріміз хақ. Еліміз аман, жұртымыз тыныш болып, Жаңа жыл жаңа табыстар әкелсін. Абай ТАСБОЛАТОВ, Парламент Мәжілісінің депутаты, генерал-лейтенант.