Алматының белсенді жастары шырша тойында бас қосты

Оңтүстік шаһардың жоғары оқу орындарында жақсы оқитын студенттер, қаланың қоғамдық өміріне белсене араласып жүрген жастар биыл да Қазақ мемлекеттік қыздар педагогикалық университетінде дәстүрге айналған «Қыздар университеті шақырады» атты жаңажылдық ән-думан кешіне жиналды. Жаңажылдық кешке Алматы қаласы Жастар саясаты жөніндегі басқармасы, қалалық Жастар саясатын дамыту мемлекеттік қоры, «Нұр Отан» партиясы жанындағы «Жас Отан» жастар қанаты, Қазақстан халқы Ассамблеясы, Республикалық «Жарасым» жас­тар ұйымы «Қазақстан студенттер альянсы» Алматы қаласы бойынша көшбасшылары, тағы басқа жас­тар ұйымдары атсалысты. «Жаңа жыл тосын сыйларға толы, таңғажайып ертегі әлемі іспеттес», деген Қыздар универ­ситеті жастары одан әрі «Ертегілер әлемінде» атты композициялық қойылымды, «Санта клаустар» флэшмобын, «Ақшақар» биін қонақтар назарына ұсынды. Ал жаңажылдық кештің қонақтары дәстүр бойынша қонақ кәде­ле­рімен барша қауымға шат-шадыман көңіл күй мен ұлан-асыр думан сыйлады. Жүрекке жылылық ұялатып, көтеріңкі көңіл күй сый­лаған кеште мерекелік әндер айтылып, билер биленді, ойындар ойналып, түрлі байқаулар өткізілді. Республикалық «Жай­дар­ман ойындарының» үздік­тері, университетіміздің «Тек қана қыздар» КВН командасы, «Томирис» би ансамблі, халықаралық және республикалық конкурстардың лауреаты «Айгүл» вокалды-аспаптар ансамблі, өзге де өнерпаз қыздар өз өнерлерімен кеш көркін аша түсті. Сәні мен салтанаты келіскен шара барысында Алматы қаласы Жастар саясаты жөніндегі басқарма басшысы Маркен Ахметов бастаған кеш қонақтары келе жатқан Жаңа жыл мерекесімен құттықтап, қуанышты көңіл күй сыйлаған Қыздар университеті басшылығы мен жастар саясаты бөліміне алғыстарын білдірді. Шара соңында Жастар ісі жөніндегі комитеттің ұйым­дастыруымен өткен «Ең үздік жатақ­хана», «Ең үздік бөлме» байқауының қорытындысы жа­рия­ланып, жеңімпаздар баға­лы сыйлықтармен, мақтау қағаз­дармен марапатталды. Айнаш ЕСАЛИ, «Егемен Қазақстан». АЛМАТЫ.