• 01 Қаңтар, 2015

Қыс маусымы қалыпты өтуде

298 рет

көрсетілді

2 мин

оқу үшін

Egemen Qazaqstan

Кеше Үкімет үйінде Премьер-Министрдің бірінші орынбасары Бақытжан Сағынтаев қысқы жылыту маусымының барысы және әлеуметтік маңызы бар азық-түлік тауарларының бағасы туралы селекторлық кеңес өткізді. Кеңес жұмысына министрліктер мен мемлекеттік мекемелердің басшылары, облыстар және Астана, Алматы қалаларының әкімдері қатысты. Энергетика министрлігінің мәліметі бойынша республика тұрғындарын электр және жылу қуатымен қамту тұрақты режімде жүзеге асырылуда. Өтіп бара жатқан жыл басынан бері елімізде 93 миллиард кВт. сағат электр қуаты өндірілген. Бұл – өткен жылғыдан 2,1 пайызға артық. Қуат көздері қоймаларында 4,5 миллион тонна көмір, 157 мың тонна мазут қоры жинақталған. Бұлар – қор нормасына сәйкес келетін көрсеткіштер. Қуат өндіруші және жеткізуші кәсіпорындардың негізгі құрал-жабдықтарына жөндеу жұмыстары жоспарға сәйкес жүргізілген. Әлеуметтік маңызды азық-түліктерге негізсіз баға өсімін болдырмас үшін өңірлердегі атқарушы органдар бағаны тұрақтандыру бойынша шаралар кешенін жүзеге асыруда. Ұлттық экономика министрлігі облыс әкімдіктерімен бірлесе отырып баға қозғалысына тұрақты түрде мониторинг жүргізу үстінде. Азық-түлік тауарларының өңірлік тұрақтандыру қорларын қалыптастыру мен пайдалану жөніндегі жұмыстар жалғасуда. Әлеуметтік маңызы бар тағам түрлеріне негізсіз баға көтеру, рынок субъектілері арасында жасырын баға келісімін жасасу, сауда нысандарына отандық тауар өндірушілердің қатысуын шектеу оқиғалары орын ала қалған жағдайда қолданыстағы заңдар аясында тиісті шаралар қолданылады. Бүтіндей алғанда, азық-түлік тауарларының баға қозғалысына бақылау жүргізу тетіктері жақсы жұмыс істеуде. Селекторлық кеңесте, сондай-ақ, жаңажылдық мереке кезінде қоғамдық тәртіпті қамтамасыз ету мәселелері де қарастырылды. Кеңес қорытындысында Бақытжан Сағынтаев тиісті атқару органдарына бірқатар тапсырмалар берді, деп хабарлады Премьер-Министрдің баспасөз қызметі. Сұңғат ӘЛІПБАЙ, «Егемен Қазақстан».