Тарихи кітапхана қорындағы көне жәдігер – кітап ескерткіштерімен және «Абай жолы» кітапханасы жобасы аясында жарық көрген жауһар туындылармен көпшілік қауымды кеңінен таныстыруды мақсат етеді. Көрме қонақтарын Абай, Шәкәрім, Мұхтардың көзі тірісінде олар туралы жазылған сирек дереккөздер ерекше әсерге бөлеген.
Әдеби экспозицияның «Абай, Шәкәрім – сирек басылымдарда» бөлімінде Абай мен Шәкәрімнің қайраткерлік тұлғасын ашатын, сирек кездесетін өлкетану басылымдары ұсынылған. Сонымен қатар жас М.Әуезовтің тұлғалық қасиетін танытатын түпнұсқалар да көрмеден орын алды.
Ал «Сирек басылымдардағы Әуезов шығармалары» бөлімі Абайдың көркем әдебиеттегі бейнесін сомдайтын «Абай жолы» эпопеясының мерзімді басылымдар беттерінде жарияланған алғашқы үзінділерімен, эпопеяның 1945, 1948, 1949, 1950 жылдардағы толық нұсқасымен таныстырды.
Әдеби экспозицияның үшінші бөлімінде облыс әкімі Н.Ұранхаевтың қолдауымен 2023 жылы жүзеге асырылған «Абай жолы» кітапханасы жобасы аясында жарық көрген өңір авторларының шығармалары қонақтардың назарына ұсынылды.
Жоба аясында хакім Абайдың, ойшыл Шәкәрімнің, суреткер Әуезовтің және осы топырақтан шыққан Халық жазушысы Ә.Нұршайықовтың, балалар жазушысы Ә.Толымбектің, қаламгерлер Т.Ысмайыловтың, Ы.Мұсаұлының, Б.Жақыптың, Д.Рамазанның, А.Кемелбаеваның әдеби-көркем туындылары мен абайтанушы ғалым Т.Жұртбайдың еңбектері таныстырылды. Сонымен қатар Ақтамберді Сарыұлы мен Дулат Бабатайұлы, Абайдың ақын ұрпақтарының шығармаларынан топтастырылған «Жыр жауҺарлары» жыр жинағы, Абай кітапханасының 140 жылдық тарихына байланысты сирек басылымдар қорынан құрастырылған «Абай кітапханасы – сирек басылымдарда», «Хранитель истории» атты қос томдық жинақтары, республикалық «Абай» журналының беттерінде жарық көрген құнды мақалалардан жинақталған «Білгенге маржан» жинағы қойылды.
Іс-шара қонақтарына 140 жылдан астам тарихы бар көне кітапхананың сирек басылымдар қорынан және «Абай жолы» кітапханасы жобасы аясында жарық көрген басылымдардан мағлұмат беретін, кюар-кодталған шығармаларды мобильді қосымшаға жүктеу мүмкіндігі бар үлестірме материалдар таратылды.
