Отандық ғалымдарымыз бен өнертапқыштарымыздың жетістігі уақыт өткен сайын еселеніп келеді. Әсіресе, соңғы кездері әлем назарына ұсынылған тың жобалар мен айтулы жаңалықтардың мән-маңызы ерекше. Міне, осынау іргелі істердің қатары тағы бір ғылыми жобамен толығып отыр. Нақтылай айтқанда, қазақстандық химик Ерлан Досжанов мұнайдан ластанған жерді тазартудың әдісін ойлап тауып, бұл жаңалығын «Еуразияның үздік жас ғалымы» сайысында сәтті қорғап шықты. Осылайша, ТМД елдерінен келген жүзден астам ғалым қатысқан конкурста отандасымыздың жұмысы мамандардың ыстық ықыласына бөленіп, «Адам экологиясы» номинациясында үздік деп танылды.
Мұнайдан ластанған топырақ қабатын микроағзаларды қолдану арқылы тазарту тәсілін ұсынған ғалым өз жаңалығының мәнісін «Бұл әдіс арқылы топырақты 73-90 пайызға дейін тазартуға болады. Көмірсутектер тотығып, соңында су мен көмірқышқыл газы бөлініп шығады», – деп түсіндірді.
Айта кетелік, Ерлан Досжанов – PHD докторы, Жану проблемалары институтының ғылыми қызметкері, сондай-ақ, топырақтың ластануы себебін биохимиялық әдіспен табу жобасының авторы.
Жолдыбай БАЗАР,
«Егемен Қазақстан».
