Көкшетау кірпіштері Ресейге экспортталып жатыр

КӨКШЕТАУ. 7 қаңтар. Көкшетаудағы «Енки» керамикалық кірпіш зауыты 300-ден астам адамды жұмыспен қамтып отыр. Ол жылына 30 түрлі 58 млн. кірпіш шығаруда. Бұл туралы egemen.kz хабарлады. Өңірдің индустрияландыру картасына енген кәсіпорын 2010 жылы іске қосылған. Жоба құны – 6 млрд. 178 млн. теңге. Отандық құрылыс материалы ел аумағын қазір түгел қамтып, енді Ресей нарығына жол тартты. «Бұрын Украинаның кірпіші үлкен бәсекелес болатын. Қазір біздің өнімнің сапасы одан артық болмаса кем емес. Бағасы да төмен. Сондықтан шеттен келетін өнімді нарықтан ығыстырып шығарып жатырмыз. Кірпіштерді Ресейдің Омбы және Түмен қалаларына жіберудеміз. Өндіріс ошағы Испанияның озық технологиясымен жабдықталған. Сондықтан зауыт өнімі сапалы әрі аязға төзімді. Оған қоса ғимарат ішінің температурасы қысы-жазы бір қалыпта ұсталады. Бүгінде зауытта 300-ден астам адам тұрақты еңбек етуде. Негізі кәсіпорын жылына 60 млн. дана өнім өндіруге қауқарлы. Ендігі мақсат – сол межені еңсеру», – дейді зауыттың бас инженері Вадим Бурыкин. Бақберген Амалбек. Дерек: egemen.kz. Сурет: 24.kz.