Биік баға

Өткен жылдың соңында ел газеті «Егемен Қазақстанның» 95 жастың төріне көтерілген тойы аталғанынан оқырман қауым хабардар. Мерейтой қарсаңында басылымның бір топ қызметкерлері мен ардагерлерінің еңбегі мемлекеттік наградалармен марапатталған болатын. Жаңа жылдың алғашқы жұмыс күндерінде тағы бір жақсы жаңалықтың хабары жетті: «Егемен Қазақстан» республикалық газеті» акционерлік қоғамының президенті Сауытбек Абдрахманов Тәуелсіз Мемлекеттер Достастығы Парламентаралық Ассамблеясы Кеңесінің шешімімен «Баспасөз бен ақпаратты дамытуға сіңірген еңбегі үшін» («За заслуги в развитии печати и информации») белгісімен марапатталды. Парламентаралық Ассамблеяның Төрайымы – Ресей Федерациясы Федералдық жиналысының Федерация Кеңесінің Төрайымы Валентина Матвиенко қол қойған №10 куәлік пен белгі С.Абдрахмановқа кеше Қазақстан Республикасы Парламентінің Сенатында табыс етілді. Награданы тапсырған Сенат Төрағасы Қасым-Жомарт Тоқаев осы марапатты иеленген тұңғыш қазақстандық журналист болып табылатын С.Абдрахмановты еңбегінің халықаралық деңгейде биік бағалануымен құттықтап, белгілі публицистің жарияланымдары Тәуелсіз Мемлекеттер Достастығы елдерінің арасындағы ынтымақтастықты нығайтуға септесетінін атап өтті. Парламентаралық Ассамблея ТМД-ға мүше мемлекеттердің парламенттік делегацияларынан құралады. Оның қызметін ТМД Парламентаралық Ассамблеясының Кеңесі ұйымдастырып, үйлестіріп отырады. ПАА-ның басты міндеті – ТМД елдерінің заңнамаларын қалыптастыру және жақындастыру. Қызметі барлық мемлекеттердің құқықтарын құрметтеуге құрылған, бүгінде беделді халықаралық құрылымға айналған ТМД Парламентаралық Ассамблеясының сан-салалы жұмысы С.Абдрахманов басшылық ететін «Егемен Қазақстан» газетінің беттерінде де, журналистің өз мақалалары мен репортаждарында да тиісті деңгейде көрсетіліп келеді. Олардың көбі Қазақстан Республикасы Парламенті Сенатының Төрағасы Қасым-Жомарт Тоқаевтың алғысөзімен жарық көрген «Қашаған құрықтаған Қазақстан» жинағында топтастырылған болатын. «Егемен-ақпарат». Суретті түсірген Аманқұл ДҮЙСЕНБАЕВ.