«Жанұя» балалар үйінде бүгінде 7 тәрбиешінің қарауында 3 жас пен 18 жас аралығындағы 45 бала тұрып жатыр. Олардың төртеуі колледжде оқып жүр. Олардың арасында спорт, өнер саласында жақсы жетістіктерге жетіп, жоғары нәтижде көрсетіп жүрген талантты жастар да бар.
«Эргашвой Эрматович бастаған этнобірлестік өкілдері бізге жиі келіп, демеушілік көмек көрсетіп тұрады. Мысалы, өткен жолы көптеген азық-түлік, жеміс-жидек, көкөністер әкеп беріп кетті. Ол кісінің бір келгені балалар үшін үлкен мереке, бәрі қуанысып, мәз болып қалады. Тәуелсіздік күні қарсаңында да арнайы келіп, балалармен әңгімелесіп, жағдайымызды сұрап, тәжік-өзбек ұлтының атынан сәлем-сауқатын беріп кетті. Үнемі жанына біраз адамдарды ертіп келіп, осында дастарқан жайып, шығыс тағамдарының мерекесін жасап кетеді. Ташкенттен келген хош иісті қауын-қарбыз, жемістерден де жыл сайын біздің балалар бірінші болып дәм татады», дейді балалар үйінің басшысы Айнаш Жақанова.
«Шарқ» сөзінің қазақша баламасы шығыс дегенді білдіреді. Аталған ұлттық орталық жылда қала орталығында ұйымдастырып тұратын дәстүрлі тәжік-өзбек мәдениетінің думанды күндері де шырайлы шығыстың бүтіндей бір шаһарын көшіріп әкелгендей өте әсерлі өтеді. Мұндайда мереке алаңына өзбек, тәжік халықтарының дәмі тіл үйіретін дәстүрлі тағамдарынан мол дастарқан жайылып, айналаны сазды музыка мен керней әуені кернеп кетеді. Қала тұрғындары көздің жауын алатын неше түрлі қолөнер бұйымдарын тамашалап, әйгілі Қожа Насыр мен Баба Диханды қызық көріп, бірге фотосуретке түсіп шаттанысып жатады.
«Тәжік-өзбек этномәдени орталығына төрағалық еткен жиырма бір жылдың ішінде осы өңірде көптеген игі жұмысты атқардық. 2006 жылдан бері қарай Қазақстан халқы Ассамблеясының мүшесімін. Біздің Достық үйінде 18 мәдени орталық бар. Бір-бірімізбен өте жақсы, тату тұрамыз. «Жанұя» балалар үйін қамқорлыққа алғанымызға биыл 21 жыл болады. «Жетім көрсең, жебей жүр» деген дана сөз бар емес пе, осы игі іске үнемі әр жердегі кәсіпкерлерді демеушілікке тартып, балаларға қуаныш сыйлап отыруды дәстүрге айналдырдық. Бұл істе бізге үлкен қолдау көрсетіп жатқан Абукахор Сафаров, Фатох Восиев сияқты жігіттеріміз Тәжікстанға жиі барып тұрады. Ол жақтан ұлттық қолөнер туындыларын, ұлттық музыка аспаптарын, одан өзге де қызықты жәдігерлер ала келеді. Осы өңірге белгілі агроөнеркәсіп саласының өкілі, қазақтың ұны мен сұйық майын экспорттап жатқан «МельАгропром» серіктестігінің құрылтайшысы, ірі кәсіпкер бауырымыз Талиб Санақұлов, «Костанайские зори» хореографиялық ансамблінің бишісі Тахир Шерметов сынды азаматтар қайырымдылық шараларына демеушілік жасап, біздің бастамаларымызды үнемі қолдап отырады. Қазақ халқында «Бірлік бар жерде тірлік бар» дейді ғой, бәріміз бір жағадан бас көтеріп, қандай міндет болса да бірігіп атқарып жатырмыз. Мысалы, елді әбігерге салған су тасқынына да тәжік-өзбек болып бас қосып, Арқалыққа он шақты жігітті қол көмекке жібердік. Өткенде Шымкенттен екі жүк көлігі гуманитарлық көмек алып келіп еді, бүгін Өзбекстаннан гуманитарлық көмек жетті. Оны жаңа ғана Қостанайдағы гуманитарлық көмек тарату пунктіне түсірдік. Енді бәріміздің мақсатымыз бір ғой. Бірлігіміз ажырамасын, соғыс деген пәле ешқашан төбемізден төнбесін. Осы елдің ынтымағы ыдырамасын», дейді Эргашвой аға.
Жаздың жаймашуақ күндерінің бірінде «Шарқ» ұлттық орталығының ұйымдастыруымен өтетін әрі қостанайлықтар үшін дәстүрге айналып кеткен мерекенің бірі – «Қауын-қарбыз күні» фестивалі. Фестиваль барысында қауын-қарбыз көрмесі ашылып, қауын-қарбыз жеуден және қарбыз дәнін теруден көңілді жарыстар басталады. Эргашвой ағаның айтуынша, қауын-қарбыз күні Өзбекстанда жыл сайын аталып өтіп тұрады. Мұндай мереке аясында өтетін қызықты сайыстарға ересектермен қатар, балабақша жасындағы бүлдіршіндер де қатысып, түрлі сыйлықтар ұтып алып қуанысып жатады.
«Жалпы, Эргашвой Эрматович бізде бұрыннан жұмыс істеп келе жатқан кісі ғой. Ол кісіні осы Ассамблеяның айналасына топтасқан түрлі ұлттық бірлестіктердің ақсақалы десек те болады. Осы өңірде өтіп жатқан түрлі мәдени-бұқаралық, қайырымдылық іс-шараларына жан сала атсалысып, үнемі шапқылап жүреді. Облыстағы екі бірдей балалар үйіне жиі барып, жыл бойы қайырымдылық іс-шараларын өткізіп тұрады. Мұның сыртында, су тасқыны кезінде Эргашвой ағамыздың арқасында еліміздің оңтүстік өңірлерінен көптеген гуманитарлық көмек қабылдап алып, халыққа таратып бердік», дейді Достық үйінің басшысы Наталья Рамазанова.
Қостанай облысы
