– Қазақ тіліне қызығушылығымды қазақ тілі пәнінен сабақ берген Гүлмира Әбілдақызы оятты. Аулада қазақ балалармен бірге ойнап өскендіктен, тілді онсыз да білетінмін. Бірақ дұрыстап ден қойғаным мұғалімімнің арқасы. Ол кісі мені аудандық, облыстық, республикалық тіл байқауларына қатыстыратын. Сөйтіп, қазақшаны қазақтан кем білмейтін дәрежеге жеттім, – деген Аркадий Побединскийдің әңгімесін тыңдаудың өзі жаныңды жадыратады.
Отан алдындағы әскери борышын өтеп келген ол 2022 жылдан бері С.Қожамқұлов атындағы Жезқазған музыкалық-драма театрының қуыршақ труппасында аккомпониатор қызметінде. Алайда Аркадийдің әке-шешесі қойған ныспысы қазір ұмытыла бастаған. Өйткені...
Қазақстанның еңбек сіңірген әртісі, әнші Ғалым Мұхамедин бірде театрға келгенде қазақшаны судай сапырып отырған сарыдомалақты көріп, әуеліде «орыспын» дегеніне нанбапты. Кейіннен оның қазақшасына сүйсінгені соншалық, «Сен бұдан былай мен үшін Аркадий емес, Ардақсың», депті. Ғалым ағаның қойған есімі әріптестеріне де ұнап, қазір оны барша жұрт «Ардақ» дейтін көрінеді.
Ол әлем ертегілерін қуыршақ тілімен қазақша сөйлетеді. Жүрген ортасына сыйлы, көрермені – балаларға сүйкімді. Жақын білетіндер Аркадийдің ізденімпаздығына тәнті. Ол Жезқазған музыкалық колледжіне оқуға түсуге келгенде бар болғаны көркемсөз оқитын. Музыкалық аспаптарда ойнай алмайтын. Қазір домбыраның құлағында ойнайды. Қазақтың басқа да бірқатар ұлттық аспабын да меңгеріп алған. Мұның бәрі – ізденістің жемісі.
Аркадий осы жылды ең берекелі жылға балайды. Өйткені жуырда ғана «Шапағат» медалімен марапатталды.
– Медальді Ақорданың төрінде Президент Қасым-Жомарт Тоқаевтың қолынан алғанымды ерекше мақтанышпен айта аламын. Мен марапат алған осы сәтті ғұмыр бойы аса зор мақтанышпен айтамын, – дейді Аркадий. Біз кейіпкерімізді құжаты бойынша жазып отырмыз. Әйтпесе, бұл азаматқа «Ардақ» деген есім әбден жарасымды секілді.
Жезқазған қаласы
