Инфографиканы жасаған – Зәуреш СМАҒҰЛ ,«EQ»
Бұл туралы өңірлік коммуникациялар қызметінің алаңында өткен брифингте облыстық білім басқармасының басшысы Иннеса Чернышева хабарлаған.
Биыл жазда сапалы демалыспен және сауықтырумен облыстағы 93 482 (99,9%) оқушыны қамту жоспарланып отыр. Оның ішінде көпбалалы және аз қамтылған отбасылардан шыққан 4 850 бала бар.
Жазда облыста 420 жазғы лагерь жұмыс істейтін болады. Оның 15-і – қала сыртындағы лагерь, 270-і – мектеп жанындағы лагерь, 135-і – бейіндік алаң.
– Балалардың жазғы демалысын ұйымдастыруға облыстағы 819 тәлімгер, 670 қосымша білім педагогі, 250 медицина қызметкері, сондай-ақ колледждер мен университеттердің студенттері жұмылдырылмақ. Каникул кезінде 8 100 оқушы қала сыртындағы лагерьлерде, 18 672 оқушы мектеп жанындағы лагерьлерде демалады. 36 қосымша білім беру ұйымында 37 900 балаға арналған күндізгі лагерьлер, дебат алаңдары, шығармашылық студиялар, спорт секциялары ұйымдастырылады, – деді Иннеса Чернышева.
Сонымен қатар жас натуралистер стансаларында далалық экологиялық мектептер қызмет етеді, оларда 750 бала ерекше қорғалатын табиғи аумақтардағы мониторингке қатысады.
Бұдан бөлек, коворкинг орталықтары, 27 аулалық клуб пен 3 500 оқушыға арналған үйірмелер жұмыс істейді.
Ең қызығы, 24 560 оқушы облыстағы ұлттық табиғи парктер мен тарихи-мәдени орындарға саяхаттайды. Атап айтсақ, олар Катонқарағай ұлттық табиғи паркін, Риддердегі Батыс Алтай табиғи қорығын, Қиын-Керіш шатқалын, Ақбауыр археологиялық кешенін, Берел қорғанын, Аблайкит кешенін, Шемонаихадағы Марья жартасын, Бұқтырма су қоймасын тамашалап, экологиялық туризм жобаларына, археологиялық мектептерге тартылады.
Сондай-ақ жетім және ата-аналарының қамқорынсыз қалған 200 бала мен туристік жарыстардың жеңімпаздары үшін Бұқтырма су қоймасына кемемен бір күндік серуендер ұйымдастырылады.
Ал «Жаздық жолдама» республикалық жобасы аясында 689 бала «Қазақстан халқына» қорының қаражаты есебінен «Дарын» лагерінде демалатын болады. Олар – ауыл мектептерінің оқу озаттары және олимпиадалар мен байқауларда жүлде алған оқушылар.
Осы ретте өңірдегі мектеп оқушыларының Алматы облысындағы «Бөбек» және «Балдәурен» ұлттық білім беру және сауықтыру орталықтарында жыл бойы тегін демалуға мүмкіндіктері бар екенін айта кеткен жөн. Биыл ол орталықтарда Шығыстың 156 баласы демалған, жыл соңына дейін тағы 277 оқушы барады.
Баса айта кетерлігі, облысымыздың бірегей жобасы – «Қонақжай отбасының» ауқымы кеңейеді. Енді оқушылар қазақ тілін үйрену мақсатында Катонқарағай ауданынан бөлек, Глубокое ауданы мен Риддер қаласына да жіберіледі.
– Былтыр жазда «Қонақжай отбасы» жобасы алғашқы рет жүзеге асқан болатын. Биыл жобаның ауқымы ұлғайып отыр. Қатарға Глубокое ауданы мен Риддер қаласы қосылды. Осы жолы 120 бала мен 50 отбасы қатысады. Былтыр 65 оқушы қамтылған, – деді басқарма басшысы.
Бұл жоба балаларды қазақ тілін қарапайым әдіспен үйретуді көздейді. Яғни оқушылар қазақшаны тілдік ортада жүріп меңгереді. Сонымен қатар балалар өлкеміздің өткенімен, ұлтымыздың салт-дәстүрімен танысып, киелі саналатын жерлерге, тарихи-мәдени орындарға барады.
Айтқандай, жазда Самар ауданындағы «Балауса» лагерінің негізінде 7-8 сынып оқушыларына арналған әскери-патриоттық лагерь ашылады. Онда оқушылар әдеттегі іс-шаралармен қатар әскери-тактикалық ойындар мен жорықтарға қатысып, жауынгерлермен кездеседі.
Жалпы, балалардың жазғы демалысы барынша қауіпсіз болуы үшін ішкі істер, санитарлық-эпидемиологиялық бақылау органдары, төтенше жағдайлар департаменті өкілдерінен құралған жұмыс тобы жасақталып отыр.
Барлық қала сыртындағы лагерьлерде сумен қамту нысандарын дезинфекциялау, кенеге қарсы іс-шаралар жүргізу жұмыстары басталып кетті. Су қоймаларына жақын орналасқан және жүзу аумақтары бар жеті лагерьде төтенше жағдайлар департаментінің мамандары шомылу орындарын белгілеп, су түбін тазалайды. Жазғы лагерьлерде төтенше жағдайлардың алдын алу мақсатында мониторинг топтары, білім басқармасында және барлық білім бөлімдерінде сенім телефондары жұмыс істемек.
Шығыс Қазақстан облысы
