Госпиталь Екінші дүниежүзілік соғыс ардагерлерімен қатар, Чернобыль апатының зардабын жоюға қатысушылар мен ауған соғысына қатысушыларға, бейбітшілік орнату мақсатында ұрыс қимылдарына қатысқан еріктілерге, Семей аумағындағы ядролық сынақтардан зардап шеккендерге де медициналық қызмет көрсетеді. «Мұнда жылына үш мыңнан астам адам келіп, ем-дом қабылдайды», дейді госпитальдың бас дәрігері Динара Аманболқызы Оразалина.
Госпитальда экспресс-лаборатория жұмыс істеп тұр. Айтқандайын, коронавирус пандемиясы кезінде госпиталь ұжымы бастама көтеріп, қатарынан үш рет инфекциялық ауруханаға бейімделді, дәрігерлер мен кіші медицина қызметкерлері уақытпен санаспай вирус жұқтырғандарды емдеп, қаншама адамды ажалдан аман алып қалды.
Ядролық апат аймағынан келген 82 жастағы Сағынтай Рахманов Астанадағы госпитальға бірінші рет жолы түскенін, болашақта әр аймақта осындай госпиталь ашылса деген пікірін білдірді. «Госпиталь ұнады, мекеме басшыларына ризамын. Барлық жағдай жасалған. Төрт мезгіл тамақ беріледі, қажетті дәрі-дәрмектен де тапшылық жоқ», деп ағынан жарылды ақсақал.
Шығыс Қазақстан облысындағы Тарбағатай ауданына қарасты Қабанбай батыр ауылының тумасы, бұл күндері Өскемен қаласында тұрып жатқан Бейсенбек Хамзин 1986 жылы Чернобыль апатының салдарын жоюға қатысыпты. «Апаттың зардабы орасан. Менімен бірге болғандардың біразы қатты радиация алып, қайтыс болды. Су ішерлігім бар екен. Өзімді күттім, қажетті дәрі-дәрмекті уақтылы қабылдап отырдым. Алматыдағы, Астанадағы госпитальдарда бірнеше рет ем алдым. Мұнда бәрі көңілдегідей», дейді Б. Хамзин.
Шымкент пен Тараздан келген Батырбек Ербосынов пен Құралбек Асанов та осындай пікірде. Олардың да госпиталь басшылығы мен қызметкерлеріне алғыстан басқа айтарлары жоқ.
Оңдасын ЕЛУБАЙ,
ардагер журналист
АСТАНА
