Атаулы мерейтойға орай жазушының шығармалары «Бір ел – бір кітап» акциясы аясында оқуға ұсынылды. Соның бірі – А.С.Пушкин атындағы Шығыс Қазақстан облыстық кітапханасында «Менің атым Қожа» кітабы бойынша оқушылар арасында «Балалар бағының бағбаны» атты оқырмандар конференциясы өтті. Шараға Шығыс Қазақстан облыстық техникалық-экономикалық лицей-интернатының, Шығыс Қазақстан облыстық дарынды балаларға арналған мамандандырылған «Білім-инновация» лицейінің оқушылары қатысты.
Жазушы «Менің атым Қожа» повесінің арқасында танымал болды. Бердібек – шығармаларында балалардың мінезін, сол кездегі уақыт көрінісін тура берген қаламгер. Мәселен, «Менің атым Қожа» шығармасында Қожаның мінезі арқылы сол кездегі қазақ баласының бейнесін тамаша жеткізеді. Арасында әзіл де жоқ емес. Әсіресе Сұлтанның жайлауға барғандағы әрекеттері өте қызық. Бердібек Соқпақбаев – өз уақытындағы баланың шынайы мінезі, әрекетін таза мүсіндеген жазушылардың бірі де бірегейі.
Балалар «Повестің басты кейіпкері Қожа қандай бала?», «Повестегі Жанар қандай оқушы?», «Ол Қожаға несімен ұнайды?», «Повестегі ұстаздар бейнесі туралы не айтар едіңіз?», «Қожаның жақсы көретін мұғалімі кім?», «Қожаның болашақта жақсы азамат болып шығатынына сенесіз бе? Оның қателіктерге ұрына беру себебі неде?» және тағы басқа сұрақтарға жауап беріп, кітап жөніндегі ойларын ортаға салды.
«Менің атым Қожа» туындысы жазушының балалар әдебиетіндегі мықтылығын көрсетеді. Киноның өзі де – өте сәтті шыққан дүние. Әсіресе кинорежиссер Абдолла Қарсақбаевтың шеберлігі фильмде көрініп тұр. Повесть бойынша «Қазақфильм» киностудиясында көркем фильм түсіріліп, 1967 жылы Канн қаласында өткен балалар мен жасөспірімдер фильмдерінің халықаралық фестивалінде арнайы жүлдеге ие болды. Повестің басты кейіпкері – Қожа арманшыл, сотқар бала. Тентектігімен үнемі түрлі жағдайға тап болып жүретін ол ақыл-ойы мен біліктілігінің арқасында қиындықтардан шыға алды. Ол – біреудің қайғы-қасіретіне көз жұма қарамайтын елгезек, жоғары әділеттілік сезіміне ие, досқа адал, қайырымды, зұлымдыққа жол бермейтін бала. Осы қасиеттердің барлығы оқырман жүрегінен орын алып, Қожа батыр бала атанды. Мұндай шығармалар балалар әдебиетіне керек-ақ. Бұл – балалар әдебиетіндегі классика.
№27 және №35 орта мектептер оқушылары көрсеткен көріністер елдің көңілінен шықты. Іс-шараға белсене қатысқан қатысушылар кітапхана әкімшілігі атынан Алғысхатпен марапатталды.
Рақия УАЛХАНОВА,
Мәдениет саласының үздігі
