Суретті түсірген – Ерлан ОМАР, «ЕQ»
Кейде тіпті талас тудырып жататындықтан, бұған дейін де қалада 180 көшенің аты жоқ екендігін, керісінше 51 көшенің атаулары қайталанатыны, кей көшелердің атауы мемлекеттік саясатқа сай келмейтіні, оғаш атаулар туралы мәселе көтеріп, арнайы мақала жазған кездеріміз де болды. Бұл мәселе қалалық мәслихат жиындарында да талқыланып жатады.
Ендігі жерде Алматыда бірнеше көшеге белгілі тұлғалардың есімдерін беру жоспарланып жатқан жайы бар. Себебі тұрғындардан қала көшелеріне Қазақстанның белгілі өнер қайраткерлері: әнші Ермек Серкебаев, композитор Ескендір Хасанғалиев, актерлер Юрий Померанцев пен Владимир Толоконниковтің есімін беру туралы өтініштер келіп түскен.
Қалалық мәслихаттың шешімімен Бостандық ауданы Ю.Гагарин даңғылының К.Тимирязев көшесінен Әл-Фараби даңғылына дейінгі бөлігіне Ермек Серкебаев даңғылы, Әуезов ауданы Юбилейная көшесіне Владимир Толоконников атын беру жоспарланып отыр. Ескендір Хасанғалиевтің есімі Түрксіб ауданының «Жас қанат» шағын ауданындағы атауы жоқ көшеге беріледі, ал Юрий Померанцевтің есімімен қаланың Бостандық ауданындағы атауы жоқ көше аталады.
АЛМАТЫ
