Фото: Президент жанындағы Мемлекеттік басқару академиясы
Елордада басталған оффлайн оқыту семинарында еліміздегі әріптестеріне БАӘ үкімет мүшелері мен мемлекеттік ұйымдармен тығыз жұмыс істейтін беделді тұлғалары дәріс өткізді. Екі күнге созылатын оқыту аясында ел экономикасындағы өзекті мәселелерді шешудің тиімді жолдары түсіндірілмек.
Екіжақты ынтымақтастық аясында әлеуетті арттыру тәжірибесіне көңіл бөлініп отыр. Бағдарлама аясында Президент жанындағы Мемлекеттік басқару академиясы мен Мұхаммед бен Рашид мемлекеттік басқару мектебі мемлекеттік органдардың басшыларын бірлесіп оқытып жатыр. Яғни Қазақстан БАӘ-ге цифрландыруға жауапты вице-министрлерді оқытуға жіберсе, олар жасанды интеллектіні қолдана отырып, түрлі салалардағы мемлекеттік басқарудың жаңа тәсілдері мен әдістерін бөлісуге ниетті.
БАӘ Министрлер Кабинеті министрінің бәсекеге қабілеттілік және тәжірибе алмасу мәселелері жөніндегі орынбасары Абдулла Нассер Лута бастаған делегация да екі ел арасындағы мәдени, экономикалық байланыстың нығаюына мүдделі. «Тек ол ғана емес, бүгін мемлекеттік қызметкерлер тәжірибе алмасып жатыр. Бұл дегеніміз біз үшін де үлкен мәртебе. Алдағы уақытта ауқымды жобаларды бірлесіп жүзеге асыруға дайынбыз», дейді мәртебелі мейман.
Президент жанындағы Мемлекеттік басқару академиясының ректоры Ерлан Әбілдің сөзінше, мемлекеттік саясатты жүргізуде араб халқының тиімді тәжірибелері көп. Бүгіннің өзінде бұл елдің ведомствоаралық коммуникацияларды оңтайлы қолдану және жүзеге асыру бағытындағы жұмысын үлгі етіп отырған мемлекеттер бар. Сондықтан вице-министрлер мен орынбасарлары, квазисектор мен департамент басшылары, академия өкілдерінен 33 адам әр түрлі топқа бөлініп, өз салалары бойынша араб әріптестерінің дәрісін тыңдады. Ал келесі жолы Қазақстан делегациясы БАӘ-ге бару көзделіп отыр. Себебі даму қарқыны жоғары, тәжірибесі озық елден үйренер дүние әлі де көп.
