Тай еліндегі турнирде 133 мемлекеттен келген 600 үміткер күш сынасады деп күтілуде. Ерлер мен әйелдерді қоса алғанда, 13 салмақ дәрежесі бойынша 51 (28 ерлер, 23 әйелдер) жолдама сарапқа салынады. Ал Олимпия ойындарында барлығы 248 боксшы бақ сынайды. Ол лицензиялардың дені былтыр Ханчжоудағы Азия ойындары мен Италиядағы іріктеу жарысында таратылған болатын.
Қазақстанның қоржынында әзірге жеті лицензия бар. Олардың иегерлері – Сәкен Бибосынов (51 кг), Сабырхан Махмұд (57 кг), Асланбек Шымбергенов (71 кг), Нұрбек Оралбай (80 кг), Айбек Оралбай (92 кг), Қамшыбек Қоңқабаев (+92 кг) және Карина Ибрагимова (57 кг). Парижге толық құраммен баруға ерлерге жалғыз жолдама жетпей тұр. Сол олқылықтың орнын толтыру үшін Таиландта 63,5 кг салмақ дәрежесінде Мұхаммедсабыр Базарбайұлы жұдырықтасады. Ал әйелдер арасындағы жарыста Назым Қызайбай (50 кг), Ұлжан Сәрсенбек (54 кг), Римма Волосенко (60 кг), Наталья Богданова (66 кг) және Валентина Хальзова (75 кг) күш сынасады.
Жоғарыда есімдері аталған былғары қолғап шеберлерінің барлығы да биыл Астанада өткен елішілік іріктеу турнирінен іркілмей өтіп, өздерінің мықтылығын мойындатқан сақа спортшылар. Сол себепті де жанкүйерлер олардың елге олжалы оралатынына сенімді. Бангкокта өтетін бұл бәсеке 2 маусымда өз мәресіне жетеді.
