«Биылғы наурыз айынан бастап аймағымызда «Руханият жылы» жарияланды. Атаулы жылға басты тарту ретінде 1000 орындық «Өнер орталығы» ашылды. Халықаралық ТҮРКСОЙ ұйымының шешімімен біздің өңір түркі дүниесінің «Ең үздік мәдени аймағы» аталымын иеленді. Бұл Сыр жағалауындағы байырғы жұрттың Орта Азиядағы рухани, мәдени кемелденген өңір ретінде лайықты бағалануы деп білеміз», деді аймақ басшысы.
Ұлт мәдениетінің мәйегі саналған өңірдегі сала өкілдерін қолдау қадамдары қуантады. Жыл сайын білімге құштар жастарға облыс әкімінің 100 гранты табысталып келеді. Одан бөлек, қабілетті талапкерлерге Қорқыт ата университетінің «Дәстүрлі өнер» мамандығына оқуға қосымша 10 грант бөлінетін болады. Былтырдан бастап мәдениет және өнер саласы майталмандарының мәртебесін көтеретін «Тұран» арнайы сыйлығы тағайындалып отыр. Салтанатты жиында бұл сыйлықтың биылғы иегерлеріне көп алдында құрмет көрсетілді. Бірқатар азаматқа облыстың Құрмет грамотасы, Мәдениет және ақпарат министрлігінің марапаттары табысталып, 8 өнер ұжымына 60 домбыра тарту етілді.
Алдағы уақытта өңірдің жазба мәдениетін насихаттайтын «Алаш әдебиеті» музейі ұйымдастырылып, жазба жәдігерлерін реставрациялауға арналған архив лабораториясы іске қосылады.
«Руханият жылы» шеңберінде облыстағы 171 мәдениет үйі мен клуб «Адал адам» тұжырымдамасы аясында қайта жаңғыртылып отыр. Аймақ мәдениетінің басты бренді – жыраулық дәстүр өкілдерінің басын қосқан «Жыраулар үйі» ашылды. Осы көктемде дала ділмары Әйтеке бидің 380 жылдығына орай тұңғыш республикалық командалық айтыс өткізілді.
«Руханият жылы» аясында Сырдария өзенінің сол жағалауынан облыстық тарихи-өлкетану музейінің жаңа ғимараты бой көтермек. Балалар талабын ұштайтын «Шығармашылық академиясы», екі ауданда «Оқушылар үйі» мен «Өнер мектебі» салынып жатыр. Өнер керуеніне талай дарынды қосқан Қазанғап атындағы Қызылорда музыкалық жоғары колледжінің жаңа ғимараты да сол жағалаудың сәнін келтіретін күн алыс емес. Жеті ауданда музей, кітапхана, архив, неке қию залы, ардагерлер және аналар, жастар орталықтарын біріктіретін типтік үлгідегі «Руханият» орталықтарының іргетасы қаланды.
Мемлекет басшысының Түркістанда өткен құрылтайда заманауи кітапхана жұмысын ұйымдастыру туралы ұсынысына сәйкес 1 маусымнан бастап Ә.Тәжібаев атындағы облыстық әмбебап-ғылыми кітапхана тәулік бойы жұмыс тәртібіне көшеді.
Былтырғы жылдың тағы бір табысы – «Сақ жауынгері» мен «Сығанақ ханшайымының» мүсіндері. Археолог-ғалымдар 20 жыл бойы жүргізген қазба жұмыстарының нәтижесінде жасалған бұл жәдігерлер қатарын биыл «Түгіскен көсемі» мен «Жетіасар ақсүйек әйелі» мүсіндері толықтырып, күзде Ұлттық музейдегі көрмеге қойылмақ.
Былтыр елордада Астананың 25 жылдығына орай «Сұлу Сырдан – ару Астанаға» атты Қызылорда облысының өнер күндері жоғары деңгейде өтті. Биыл аймақ өнерпаздары осындай сапармен Алматы қаласына жол тартады. Облыстың мәдени ұйымдар мамандары Италия, Беларусь елдерінде біліктілігін арттырып келеді. Өзге ел өнерімен танысып, Еуропадағы белгілі концерттік залдардың озық тәжірибесін үйреніп жүр.
Алда ел намысын қорғаған ер Жанқожа Нұрмұхамедұлының 250 жылдығына орай дастан орындаушылардың республикалық фестивалі жоспарланып, Қазақстанның Халық жазушысы Әбдіжәміл Нұрпейісовтің 100 жылдығына орай «Соңғы парыз» романы ТҮРКСОЙ ұйымының қолдауымен түрік тіліне аударылып жатыр.
Осы күні «Өнер орталығына» келгендер Әбілхан Қастеевтің 120 жылдығына орай ұйымдастырылған «Қылқаламда мәңгілік ел бейнесі» атты халықаралық симпозиум қатысушыларының көрмесін тамашалады. Жиын соңы жергілікті өнерпаздардың концерттік бағдарламасына ұласты.
Қызылорда
