Қалалық демесеңіз, жоғары деңгейде ұйымдастырылған жас күйшілер байқауы республика көлемін қамтыды десе, артық емес. Байқауға қатысушы домбырашылардың дені К.Байсейітова атындағы Қазақ ұлттық өнер университеті мен колледждер студенттері және өнер мектептерінің оқушылары. Сайыс Арқа күйшілік өнерінен болғандықтан, шертпе күйдің тұма басында Тәттімбет тұрған соң, Қарағандыдағы күйші атындағы өнер колледжінен өнерпаздар келіп қатысты. Бас-аяғы жиырма үш жас домбырашы байқау шарты бойынша бірінші кезекте екі күйден орындап шықты. Мұнда Тәттімбет, Тоқа, Итаяқ, Қыздарбек, Әбдилердің шығармашылығымен қоса, сирек орындалатын Сармантайдың Ахметжанының «58» атты қасірет күйі, Сәкеннің әкесі Сейфолланың «Қосбасары», Аққыздың туындылары тартылды. Астана қаласы әкімдігінің «Бірлескен мұражайлар дирекциясы», Сәкен Сейфуллин музейі ұйымдастырарда К.Байсейітова атындағы Қазақ ұлттық өнер университетінің күйшілерімен кеңесіп пішкені байқалады. Қатысушы өнерпаздар бірінен бірі өтеді. Тәттімбет пен Тоқа сынды небір ерен күйшілердің сирек орындалатын шығармаларын орындап отырды. Талапты жастардың өнерін бағалаушы қазылар алқасының төрағасы – Мәдениет қайраткері, «Халық күйшісі» медалінің иегері, күйші-композитор Ахат Байбосынов, құрамында – Қазақстанның еңбек сіңірген қайраткері, профессор Жанғали Жүзбай, Қазақстанның еңбек сіңірген қайраткері, Қазақ ұлттық өнер университетінің Домбыра кафедрасының меңгерушісі Абылғазы Ахмадиев, Мәдениет саласының үздігі, республикалық Тәттімбет конкурсының бас жүлдегері Қайрат Айтбаев, Мәдениет саласының үздігі, Қазақ ұлттық өнер университетінің оқытушысы Ерболат Сапуанов, Тәттімбет өнер колледжінің ұстазы, республикалық шертпе күй конкурсының бас жүлдегері Мадияр Сүлейменов бар.
«Сәкеннің мерейтойымен қатар байқау 31 мамыр – Саяси қуғын сүргін және ашаршылық құрбандарын еске алу күні қарсаңына да келеді. Себебі күйшілердің көбі 1928-1930 жылдардың басында атылып кетті. Оның үстіне Сәкен күйді өте қатты жақсы көріп, қастерлеген. Кейінгі ұрпаққа аманаттаған. Қазақтың найзасы қандай өткір болса, домбырасы одан кем түспеген. Халық күй тыңдап рухтанған. Әйтпесе, «Абылай хан атты әскерінің маршын» қалдырып, аманаттамас еді», деп құттықтау сөзін тарих ғылымдарының докторы, Сәкен музейінің директоры Марат Әбсеметов сөйледі.
Не керек, жас домбырашылардың көбі қазақтың күй өнерін шебер меңгергенге ұқсады. Жеткіншек жастар майыстырып домбыра шерткенде жаның кіреді. Сонымен қатар мұражайдың шағын залында домбыра үні дауыс зорайтқышсыз-ақ күмбірлеп тамаша естіледі. Өткенде бір өнертанушылар күй концертін үлкен залдардан гөрі киіз үй сынды кішірек орындарда өткерсе, шырайы сонда кіреді деген сөздің дәлелін осы байқау көрсеткендей. Күйші қазылар да «мына жер тамаша екен, әрбір қағыс анық естіледі», деп отырғандарын естіп қалдық. Демек домбыраның даусы да күй талғайды деген сөз.
Сонымен қазылар алқасының шешімімен байқаудың бас жүлдесін Нұрболат Тапалов есімді өнерпаз жеңіп алды. Жүлделі бірінші орынды Бекзада Достиярова иеленді. Екінші, үшінші орын Темірлан Кубат пен Сейдәлі Бауыржанға бұйырды. Жеңімпаздарға диплом және ақшалай сыйлықтар тапсырылды.
Астана қаласы Сарыарқа аудандық әкімдігі, Сәкен Сейфуллиннің нағашы қарындасы Асылгүл Әбіш, кәсіпкер Ерубай Исатаев іс-шараға демеушілік еткенін атап өткен ләзім.
