Суретті түсірген – Ерлан ОМАР, «ЕQ»
ТМД-ға танымал зауыт
Кәсіпорында автотрансформаторлар, күштік май трансформаторлары, қуаты 500 МВА, кернеуі 110, 220, 500 кВ реакторлар шығарылады. Өндірістік қуаты жылына 12 000 МВА-дан асады немесе 120 трансформаторды құрайды. Бүгінгі таңда жылдық қуаттылығы 70 трансформаторға жетіп отыр. Компания өнімдері Астана, Шымкент қаласы мен Түркістан, Павлодар, Өскемен, Ақтау, Қарағанды, Атырау өңірлеріндегі қосалқы стансаларға орнатылған. Сонымен бірге, өнімнің 16 пайыз үлесі сырт елдерге экспортталады.
Экспорт үлесін арттыру мәселесіне де ерекше көңіл бөліп отыр. Соның аясында ТМД елдері нарығына кернеуі
110 кВ және одан да жоғары трансформатор жабдықтарын жөнелтуді арттыра бермек. Кәсіпорын жыл сайын жаңа өнім түрлерін игеруді алдына мақсат етіп қойған. Сол үшін былтыр қуаты 250 000 кВА, кернеуі 500 кВ үш фазалы орындаудағы автотрансформатор жасап шығарды. Бұл, әлбетте, зауыт тарихындағы ең ірі өндірістік жетістік. Тіпті мұны тұтас еліміздің жетістігіне баласақ болады. Мұндай ірі көлемдегі күрделі технологиялық электр жабдығын жасау Қазақстанда жалғыз осы зауыттың қолынан келіп отыр. Жоғарыда аталған автотрансформатордың ұзындығы 13 метрден, ал биіктігі 10 метрден асады, салмағы – 300 тоннаға жуық.
Зауыт ең соңғы үлгімен жабдықталған
Күрделі технологиялық өнім шығарылатындықтан жұмысшылардың біліктілігіне қатты көңіл бөлінеді. Сондықтан оларды оқыту, шеберліктерін шыңдау үздіксіз жүріп отырады. «Asia Trafo» өнімдері сапа менеджменті, қауіпсіздік, еңбекті қорғау, экологиялық менеджмент бойынша түрлі халықаралық сертификаттармен расталған.
Зауытта ең соңғы үлгідегі жабдықтар мен станоктар орнатылған. Олар еңбек өнімділігін арттырып, жұмыстың көп бөлігін автоматтандыруға, өнім сапасын жақсартуға көп үлес қосып отыр. Тіпті өндірістік басқаруда әлемдегі бренд өнімдер шығаратын алпауыт компаниялардың озық тәжірибелері қолданылады. Экологиялық тазалықты сақтау мақсатында кәсіпорын аумағында 1 500-ден астам жеміс ағашы отырғызылған. Сондай-ақ білікті кадрларды даярлау мен дуалды оқыту жүйесін күшейту бағытында еліміздің жетекші технологиялық жоғары оқу орындарымен арнайы келісімдер жасалған. Мәселен, өткен жылы зауыт базасында ашылған Сәтбаев университетінің «Энергетика» кафедрасы соның бір айғағы.
Кәсіпорын 2019 жылы Шымкентте өткен «Қазақстанның үздік тауары» өңірлік көрмесінде «өндірістік мақсаттағы үздік тауарлар» номинациясының жеңімпазы атанған. Дәл осы номинацияны компания былтырғы байқауда да жеңіп алды.
Жалпы, кәсіпорынның жобалық құны – 32 млрд теңгеге тең. Оның 17,4 млрд теңгесі – компанияның жеке қаражаты. Қалған инвестициялық қаржыны компания банктен несиеге алған. «Тассай» индустриалды аймағында орналасқаны үшін және ииновациялық өнім шығаратындықтан кәсіпорынға мемлекет тарапынан бірталай жеңілдік қарастырылған. Айталық, технологиялық жабдықты әкелгені үшін баж салығынан, сондай-ақ мөлшерлеме бойынша жер, мүлік, корпоративтік табыс салығынан босатылған.
Бүкіл бөлшекті өзі өндіреді
«Asia Trafo» ЖШС басқарма төрағасы Омар Асановтың айтуынша, кәсіпорын трансформатордың барлық бөлшегін өзі жасап шығарады. Сондықтан оның өнімдерін жүз пайыз отандық өнім деуге толық негіз бар. Көптеген елде тіпті Еуропа мемлекеттерінің өзінде, қасымыздағы көрші Ресейде де трансформаторды толық бір зауыт өндірмейді. Әр бөлшегін әртүрлі зауыт жасайды. Ал «Asia Trafo» трансформаторға қажетті бүкіл маңызды бөлшектерін бір өзі жасап, оны сынақтан өткізіп, сапалы құрастырып шығарады. Трансформатор жабдығы өзінің төл өнімі болғандықтан оның сапасына да күмән келтірмейді. Сондықтан 5 жылға кепілдік мерзіммен береді. Кәсіпорын сондай-ақ бұзылған шетелдік трнасформаторларға отандық компаниялардың өтінішімен жөндеу жұмыстарын жүргізеді.
«Шымкент қаласын 30-40 пайыз электр энергиясымен қамтамасыз ететін «Бозарық» қосалқы стансасында өрт шығып, «Сименс» компаниясының трансформаторлары жарамсыз күйге түскен. Соны жөндедік. Осы күнге дейін Италия, Украина, Қытай трансформаторларының қаншамасын жөндеп тастадық. Негізінде жабдықты жасаған ел өзі қалпына келтіру керек. Бірақ ол жаққа жіберіп, жөндетуге қаншама уақыт пен қаражат жұмсалады. Екі ортада әуре боп жүргенде қондырғының кепілдеме мерзімі де бітіп қалуы мүмкін. Сондықтан қалтасын ойлаған жергілікті компания, мекемелер трансформаторларын бізге әкеп жөндетеді. Трансформатордың ең керекті бөлшегінің бірі – электр техникалық болат материалы. Оны табақша күйінде сатып әкеліп, арнайы пішінде кесіп қабаттастырып жинаймыз. Ирелеңдеген мыс шикізатынан жұқа сым иіріп, сосын оны ораймыз. Одан қалса қағаз-картоннан электр жабдықтарын изоляциялап, сыртын қаптаймыз. Қондырғының темір қаңқасы да цехтарда электрмен дәнекерленіп құрастырылады. Кейін жеке-жеке бөлшектердің басын құрап, жинап, арнайы бөлмеде сынақтан өткіземіз. Бұл өндірістік тізбек аса дәлдік пен ауқымды еңбек күшін талап етеді. Сол себепті, мамандар біліктілігі мен станоктардың заманауи үлгісіне баса көңіл бөлеміз. Алдағы міндетіміз – өндіріс қуаттылығын арттырып, экспорттық әлеуетімізді күшейту. Осыған бар күш-жігерімізді саламыз», деді серіктестік басқарма төрағасы О.Асанов.
Әлеуметтік ахуалға көңіл бөледі
Кәсіпорында еңбеккердің әлеуметтік тұрмысын жақсартуға барынша қолайлы жағдай қарастырылған. Мәселен, жаңадан отау құрған жас жұбайларға – 1 млн теңге, әрбір дүниеге келген сәбиге 400 мың теңге сыйақы беріледі. Сондай-ақ өз еркімен шетелге біліктілігін арттыруға барған жұмысшының оқу ақысы мен жүріп-тұру шығындарын компания толық өзі өтейді. Бұдан бөлек, отбасылы жас мамандарға зауыт жанынан жатақхана да ұсынылған.
ШЫМКЕНТ
