Кезінде жастар буыны арасындағы жарыстарда жақсы нәтиже көрсеткен Анна 2012 жылы Лондонда алауы тұтанған Олимпия ойындарында 69 кг салмақ дәрежесінде өнер көрсетіп, үздік бестікті түйіндеді. Оның көрсеткіші – 251 (115+136) кг. Алайда арада біраз уақыт өткеннен соң Беларусьтің қос спортшысы – аталған жарыстың қола жүлдегері Марина Шкерманкова мен төртінші сатыға жайғасқан Дина Сазановецтің допинг қолданғаны анықталып, олар түрлі мерзімге үлкен спорттан шеттетілді. Соның арқасында Нұрмұхамбетова үшінші орынға көтерілді. Көп ұзамай күміс медальды иеленген румыниялық Роксана Кокоштың да қанынан рұқсат етілмеген дәрі-дәмектің нышаны табылып, ол да қатаң жазаланды. Осылайша, Лондон Олимпиадасының күміс жүлдесі біздің қызға бұйырды.
Күні кеше Перуде өткен жасөспірімдер арасындағы әлем біріншілігі барысында Халықаралық Олимпиада комитетінің (ХОК) құрметті мүшесі Иван Дибос Лондон Олимпиадасының күміс медалін Анна Нұрмұхамбетоваға салтанатты түрде табыс етті. Сөйтіп, арада 12 жыл өткеннен соң жүлде өз иесін тапты.
Салтанатты рәсімде толқынысын жасыра алмаған Анна: «Перудегі әлем чемпионатына келгенімен қуаныштымын. Бұл жерде маған Олимпиаданың медалі табысталды. Қазір қандай сезімде екенімді құр сөзбен жеткізе алмаспын. Мені марапаттаған федерация мен ХОК мүшесіне өз алғысымды білдіремін. 2012 жылғы Олимпия ойындарының күміс жүлдегері атанғаныма қуаныштымын. Бұл – менің мансабымдағы ең ірі табыс. Осы жарысқа қатысып жатқан жас спортшыларға табыс пен төзім және сәттілік тілеймін», деп ағынан жарылды.
