Жаңа бағдарламаның ерекшелігі қандай дейсіз ғой? Компанияның бас техникалық директоры Мира Муратидің айтуынша, GPT-4o алдыңғы модельдерге қарағанда әлдеқайда жылдам жұмыс істейді. OpenAI-дың бұған дейінгі GPT-4 моделі мәтін күйінде ғана берілген сөзді түсіне алатын еді. Ал жаңартылған GPT-4o нұсқасы 50 тілді еркін меңгеріп қана қоймай, ауызша айтылған сөзді де талдай алатын мүмкіндікке ие. Мұндағы «o» әрпі «omni» деген мағынаны білдіреді. Қазақшаласақ, «жан-жақты». Яғни ол мәтінді, ауызша айтылған сөзді, сонымен қатар бейнені өңдей алады. Ал ең маңыздысы, қазақ тілінде еркін әңгімелеседі. «Әңгімелеседі» деп отырғанымыз да бекер емес. Өйткені OpenAI-дің бұл шығарылымы адамға көбірек ұқсайды. Ол сұрақтарға жауап бергенде әңгімелесушінің дауыс ырғағы мен көңіл күйін аңғарып, соған сай эмоционалды реңкте жауап қайырады. Тақырыпқа байланысты бірде қуанады, бірде мұңаяды. Сұрақ қоюшы мейлінше ашылып, сырын бүкпей, сауалын нендей мақсатта қойып отырғанына дейін айтып, еркін сөйлессе, жасанды интеллекті де жағымды ақпаратын жасырып қалмайды. Бұдан бөлек, GPT-4o моделімен ауызша сөйлесе отырып, оған телефон камерасында математикалық есептің суретін көрсетуге болады. Сол арқылы жасанды зерде небір күрделі есептердің де шығарылу жолын сізге ауызша түсіндіріп береді.
