• 25 Сәуір, 2015

Қазақстан хоккейшілерінің табысы

280 рет

көрсетілді

1 мин

оқу үшін

Egemen Qazaqstan

Кезектен тыс президенттік сайлау қарсаңында хоккейден Қазақстан құрама командасы ел жанкүйерлеріне үлкен сыйлық жасады. Польшаның Краков қаласында өтіп жатқан бірінші дивизиондағы (А тобы) әлем чемпионатында қазақстандық хоккейшілер қатарынан төрт мәрте жеңіске жетіп, мерзімінен бұрын кілең мықтылар шоғырланған жоғары дивизионға жолдама алды. Қазақстан құрамасы әуелі Украина құрамасын 5:2, содан кейін Венгрия құрамасын 5:0, келесі кезекте Жапония құрамасын 7:2 және жергілікті Польша құрамасын 3:2 есебімен ұтты. Сөйтіп, қарсыластар қақпасына 20 шайба соққан қазақстандықтар өз қақпасына бар-жоғы 6-ақ шайба жіберіп алды. Осылайша, Қазақстан құрамасы Италиямен бүгін болатын соңғы ойын нәтижесіне қарамай-ақ әлемдік біріншіліктің ТОП-16-сы қатарына қосылды. Дастан КЕНЖАЛИН, «Егемен Қазақстан».