Өткен жолы үйлердің сапалы болып салынып жатқанын, көлемі 80 шаршы метр екенін, жер көлемі 10 сотық болатынын, тіпті ауласына өрнектас төселіп, дуалы екі метрге жуық қоршаумен қоршалатынын да айтқанбыз. Оның үстіне үйдің ішіне санузел орнатылады, ыстық, суық сулар қалалық кәріз құбырларымен келеді. Шайынды сулар септик арқылы шығарылады. Сондықтан көп адамға арман болған жайлы жер үйлер 700 отбасын қуанышқа кенелтері сөзсіз.
Қазір бұл ауданға жаңа балабақша тұрғызу да қолға алынып жатыр. 90 бөбекке шақталған балабақшаның жобасы көз сүріндіреді, тек енді оны салуды міндетіне алған «Мирас Group» ЖШС құрылыс компаниясы жобадан ауытқымай жайнатып салып шықса болғаны. Бұл құрылысқа бюджеттен 500 млн теңге бөлініпті. «Құрылыс жұмысын биылғы қыркүйектің бірінде аяқтаймыз. Қазір жердегі жұмыстар жасалып жатыр. Әзірге бес техника мен он адам тартылған. Құрылыс көлемі артқан кезде бұл жерде 50 адам жұмыс істейтін болады. Балабақшаның қабырғалары газблок кірпіштерден тұрғызылады», деді құрылыс учаскесінің бастығы Фархат Сейпілов.
Жаңа ауданда салына бастаған 100 үйдің құрылысы 90 пайызға аяқталды. Бесінші маусымда оның 50-ін пайдалануға береді.
Болашақта жаңа ауданға мектеп, мәдениет үйлері де салынады. Жаңа кентті абаттандыру жұмысына да барлық қалалық тартылуда. «Таза Қазақстан» республикалық акциясы аясында облыс әкімі Ғауез Нұрмұхамбетовтің өзі қатысып, құрылыс компанияларының басшыларымен бірге жаңа саябаққа ағаштар отырғызды. Қазір әкімнің жұмысындағы басты приоритет те осы аудан.
Осындағы тамаша үйлердің негізгі бөлігі еліміздегі түрлі этнос өкілдеріне бұйырғалы отыр.
Бұл жағдай осындай сын сағатта жұртшылықты біріктіріп, халықтың тұтастығын одан әрі нығайта түсері сөзсіз. Тұрғындар қиын кезеңде қолтықтан демеген мемлекетке шынайы алғысын білдіріп отыр.
Жаңа аудан құрылысы осылай жүріп жатса 98 отбасына қайталама нарықтан үйлер сатып әперілді. Облыс бойынша жалпы саны 3 898 үй зардап шеккен. Соның 1 720-сын бағалау комиссиясы қалпына келтірілмейді деп шешті. Қалада осының 700-не жаңа үйлер салынып жатқанын айттық, одан басқа жүзге жуық отбасына өздері қалаған пәтерлер сатып әперілді. Алайда әлі де мыңға жуық отбасын күзге дейін үймен қамтамасыз ету жұмысы алда тұр.
Облыс бойынша зардап шеккен үйлер арасынан 2 178 үй қалпына келтіруге болады деп шешілген. Петропавлдың ондай үйлері – Ойқала, Тері зауыты, Заречный шағын аудандары мен Тепличный, Прибрежный ауылдарындағы 270 үй. Бұл үйлерге аудандарда құрылған мехбригадалар жөндеу жұмыстарын жүргізуде.
Бұдан басқа 1055 үйдің қожайындары шаңырақтарын өз күшімен жөндеуге шешкен. Оларға шығынның көлемі анықталып, бюджеттен қаражаттай көмек берілетін болады.
Жалпы, халық тасқынның әбігерінен арылып, қазір қалыпты тірлікке жаппай көшкен. Мамырдың қара суықтары шыққаннан бері жеміс-жидектерін, көкөністерін отырғызуға асыққандар да көп. Тек қала көшелерінің әбден талқаны шыққан жолдары ашу-ызаны туғызады. Биліктің қолы оған да жетер деген үміт бар. Жайлы өмір, жарқын тұрмысқа не жетуші еді.
Солтүстік Қазақстан облысы
