Маңғыстауда ірі компаниялар әлеуметтік міндеттерін нақтылады

АҚТАУ. 16 қаңтар. Маңғыстау облысы аумағындағы ірі мұнай-газ өндіруші компаниялар өз жұмысшылары алдындағы әлеуметтік міндеттерін орындайтындықтарын нақтылай түсті. Бұл туралы Маңғыстау облысы әкімінің баспасөз қызметі хабарлады. Мұнай бағасы төмендегенмен, өңірдегі еңбек ұжымдарындағы әлеуметтік тұрақтылықты сақтау мәселесін ортаға салған басқосуға Маңғыстау облысының әкімі А.Айдарбаев және Маңғыстаудағы мұнай-газ өндіруші мекемелер басшылары қатысқан. Әлемдік нарықта мұнай бағасы төмендеу тенденциясы байқалғандығын, бүгінгі таңда аймақтағы кәсіпорындардың тұрақтылығын сақтаудың өзектілігін айтқан өңір басшысы кәсіпорын басшыларын алдыңғы кезекте жұмыс орындарын сақтау, жұмысшыларды қысқартуға жол бермеу және еңбекақының төмендеуін болдырмауға шақырған. Жиын нәтижесінде тараптар қаңтардың 20-на дейін жұмысшылардың еңбекқұқын қамтамасыз ету туралы Меморандумға қол қояды деп күтілуде. Гүлайым Шынтемірқызы. Дерек, сурет: Маңғыстау облысы әкімінің баспасөз қызметі.