Мәскеуде ұрылар 3,3 млн. долларды қоқыспен ауыстырып кетті

АСТАНА. 25 сәуір. Мәскеудің Домодедово әуежайында ұрылар 3,3 миллион долларды құрылыс қоқысымен ауыстырып кеткен. Ресей полицейлері әуе жүгінен ұрланған ақшаға қатысты қылмыстық істің ақ-қарасын анықтады. Бұл туралы today.kz хабарлады. Мәскеуге Новосібірден келген қымбат жүкті қабылдау кезінде екі қапқа салынған ақшаның орнында құрылыс қоқысы болған. Ресей Ішкі істер министрлігінің Мәскеу қаласы бойынша баспасөз қызметі таратқан мәліметке сүйенсек, Новосібір-Домодедово бағытымен Мәскеу қаласына келген жүктің салмағы мен пломбасында сәйкессіздіктер анықталған. Нәтижесінде, екі қаптағы 3,3 миллион доллардың орнына құрылыс қоқысы шыққан. Ресей валютасымен есептеу кезінде шығын көлемі 180 миллион рубльді құраған. Кейіннен бұл қылмысқа құнды заттарды тасымалдаумен айналысатын компанияның үш қызметкері күдікті деп танылған. Бұрын Домодедовода жүк тасмылдаушы болып жұмыс істеген үшеуі 2014 жылы жұмыстарынан шығарылған екен. Жүктерді түсіру технологиясын жақсы меңгерген олар ұрлықты әуежайда жасаған. Ақшаның жоғалғаны белгілі болғаннан кейін полицейлер әуежайдың қауіпсіздік қызметімен бірге бұл қылмысты бір тәуліктің ішінде әшкереледі. Ұрлық жасағандардың барлығы өз кәніларын мойындап отыр. Қазіргі таңда бұл оқиға бойынша Ресей Федерациясы Қылмыстық кодексінің 158-бабы 4-бөлігі («Ұрлық») бойынша қылмыстық іс қозғалды. Бұл бап бойынша ұрылар ең ауыр жаза – 10 жылға дейін бас бостандығынан айырылуы мүмкін. Еламан Қоңыр. Дерек: today.kz. Сурет: webpark.ru.