Кітапхана • 20 Маусым, 2024

Тәулік бойы жұмыс істейтін кітапхана

29 рет
көрсетілді
2 мин
оқу үшін

Егер оқырман есінде болса, былтыр маусым айында Ұлттық құрылтайдың екінші отырысында Мемлекет басшысы Қасым-Жомарт Тоқаев тәулігіне 24 са­ғат жұмыс істейтін кітапха­налар құру туралы бастама көтерген еді. Қазіргі таңда осынау ұсыныс Алматы сияқты үл­кен шаһарда іске асып жатыр.

Тәулік бойы жұмыс істейтін  кітапхана

Таяу күндері мегаполисте тәу­лік бойы және демалыссыз жұмыс істейтін тағы бір кітапхана пайда болды. Білімін байытамын деген, керегін іздеген оқырмандар үшін 24/7 режімінде жұмыс істейтін кітапхана қай тұрғыдан алсақ та қолайлы.

Мәселен, осы орайда Алматының екі кітапханасы – Жамбыл атындағы қалалық жасөспірімдер кітапханасы мен «Alatau Creative Hub» орталығының кітапханасы 2023 жылдың қыркүйек айынан бері (2023-2024 оқу жылы) оқырмандарды тәулік бойы қабылдай бастағанын айта кетуге болады.

Алматы қалалық Мәдениет басқар­масы мұндай қадамдар оқушылар, сту­денттер, магистранттар ғана емес, док­торанттар арасында өте қолайлы екендігі алға тарта келе, Абай даңғылы, 141 мекенжайында орналасқан кезекті кітапхана да енді жерде 24/7 режімінде жұмыс істейтіндігін хабарлады.

«Қазірге Алматыда үш кітапхана оқыр­мандарды 24 сағат бойы қабыл­дайды. Кез келген адам өзіне ыңғайлы уақытта келе алатындықтан, кітапханаға келушілердің қарасы көбейді. Нақтырақ айтсақ, 2023 жылғы қыркүйек айынан бері Жамбыл атындағы қалалық жасөспірімдер кітапханасына 27 650 адам келсе, «Alatau Creative Hub» орталығының кітапханасы 28 мың оқыр­манға қызмет көрсеткен. Жалпы, алматылықтар кітап оқығанды жақсы көреді. Тек қалалық кітапханалардағы көрсеткіштерге тоқталсақ, оқырмандар жыл сайын кем дегенде үш миллион рет келіп-кетеді», дейді Алматы қалалық Мәдениет басқармасының өкілдері.

Қазіргі таңда Алматыда 28 қалалық кітапхана жұмыс істейді. Олардың 95%-ы жаң­ғыртылып, материалдық-техникалық базасы мен кітап қоры толығып, жайлы оқу залдары мен интернет-залдар пайда болды.

Алматы кітапханашылары оқыр­мандарға қызмет көрсету сапасын арттыру мақсатында алғаш рет Оңтүстік Корея, Германия және Швейцариядағы үздік кітап­ханаларда тағылымдамадан өтіп келді.

 

АЛМАТЫ