Жаз басталып, тұрғындар арасында суға, әсіресе ауызсуға қатысты мәселе қайта көтерілген тұста Сайын Шапағатов аулында Маңғыстау облысының әкімі Нұрдәулет Қилыбайдың қатысуымен су тұшыту қондырғысы іске қосылды. Он мыңға жуық тұрғыны бар Сайын аулында жаңа су тұшыту қондырғысының іске қосылуы бұл бағыттағы көңіл көншітіп, қиындықты жеңілдетер жаңалықтың бірі болды.
Жаңа қондырғының көмегімен зауыт қуаты екі есе артты. Кәсіпорын тәулігіне 4 500 текше метр су тұшытады. Бұл он мыңға жуық тұрғыны бар Сайын Шапағатов пен көрші 15 мың адам тұратын Ақшұқыр ауылын ауызсумен қамтамасыз етуге толық мүмкіндік береді. Су тұшыту зауыты шикізат ретінде жерасты суын пайдаланып, ауыл халқына санитарлық талапқа сай ауызсу ұсынады. Алдағы уақытта өндіріс ошағының тәуліктік қуаты 6 500 текше метрге дейін артпақ. Жаңа зауыттың жалпы құны – 1 000 000 000 (1 млрд) теңге, жобаны «Алека» ЖШС «Халық» қайырымдылық қорының қолдауымен іске асырып отыр.
Нұрдәулет Қилыбай игі бастамаға мұрындық болған кәсіпкерлерге маңғыстаулықтар атынан алғысын жеткізді.
«Мемлекет басшысының өңірдегі су тапшылығын жойып, халықты таза сумен қамту жайында арнайы тапсырмасы бар. Жерлестерімізге тіршілік нәрін жеткізу ісі күн тәртібінен түспейді. Қазір облыста ауызсу тапшылығын жою үшін бірқатар жоба қарқынды жүріп жатыр. Нәтижесін көретін сәт те алыс емес. Тамыз айына дейін «МАЭК» ЖШС аумағында тәулігіне 6 мың текше метр су тұшытатын қондырғы іске қосылса, «СК-А-Строй» ЖШС су тұшыту зауыты қуатын 5 мыңнан 9 мың текше метрге дейін арттырады. Сондай-ақ тамыздан бастап Ақтау қаласына тәулігіне қосымша 6 мың текше метр ауызсу, Баянды ауылындағы су тұшыту қондырғысы арқылы тәулігіне қосымша 3 мың текше метр ауызсу Мұнайлыға беріледі», деді аймақ басшысы.
Маңғыстау облысы
