Жұмыс • 26 Маусым, 2024

Жәрмеңкеде жұмыс орны ұсынылды

43 рет
көрсетілді
4 мин
оқу үшін

Облыс орталығында «Шығыс маманы» атты бос жұмыс орындар жәрмеңкесі өтіп, 100-ден астам жұмыс беруші қатысты. Жәрмеңкеде 1 500-ден астам бос жұмыс орны ұсынылды. Айта кету керек, әсіресе шалғай аудандарда маман тапшылығы байқалады.

Жәрмеңкеде жұмыс орны ұсынылды

Білікті, білімді маман та­бу үшін жұмыс ұсы­ну­шылардың қата­рын­да маман тапшылығын көріп отырған аудандар мен қала­лар­дағы әр сала өкілдері келіп қа­тыс­ты. Одан бөлек «ҮМЗ» АҚ, «Біріккен энергетикалық ком­пания» АҚ, «Востокцветмет» ЖШС, «Өскемен құс фабрикасы» АҚ сынды алпауыт компаниялар мен шағын кәсіпорын иелері де жа­уапты әрі сауатты маман іздеп келді.

– «Шығыс маманы» бос жұ­мыс орындар жәрмеңкесінің мақсаты – жұмыс берушілер мен жұмыс іздеуші мамандарды, жастарды бір-бірімен тікелей байланыстырып, жұмыссыздардың қатарын азайту еді. Шығыс Қазақ­стан облысы бойынша 100-ден астам жұмыс беруші 1 500-ден астам бос жұмыс орнын ұсынып отыр. Өңірімізде түрлі өнеркәсіп салаларында, тау-кен өндірісінде, білім және медицина мамандарының тапшылығы бар екені анықталып отыр, – дейді облыстық жұмыспен қамту және әлеуметтік бағ­дар­ламаларды үйлестіру бас­қармасы басшы­сы­ның орынбасары Динара Қожанова.

Маман іздеушілердің қата­рында мемлекеттік басқару жүйесінің ұйымдары, қаржы сала­сы, құқық қорғау органдары, білім беру, денсаулық сақ­тау, мәдениет мекемелерінің өкіл­дері де бар. Айта кетсек, орман шаруа­шылығы саласында да маман тапшылығы бар.

– Біз бос жұмыс орындар жәрмеңкесіне биыл үшінші рет қатысып отырмыз. Қазіргі таңда Президент тапсырмасымен Ұлттық ұланға қабылданатын әскери қызметшілердің қатары арта түсті. Осыған байланысты бізде жаңа лауазымдар ашылып жатыр. Сондықтан бос тұрған лауазымдарға маман іздеу үшін бүгінгі жәрмеңкеге қатысып отырмыз. Бізге жұмысқа кірген әскери қызметшілердің офицер шеніне дейін көтеріліп, әскери оқу орындарында білім алуына мүмкіндігі бар. Одан бөлек, әскери қызметші­лерге көрсетілер әлеуметтік көмектің де түрі көп, – дейді 3477 ұлттық ұлан әскери бөлімі командирінің тәрбие және әлеуметтік-құқықтық жұмыстар жөніндегі орынбасары, майор Аңсар Шәкенов.

Жәрмеңкеге қатысушыларға жаңадан құрылған Марқакөл ауданынан келген өкілдер көптеген бос жұмыс орнын ұсынса, Глубокое ауданының білім бөлімі 99 бірлік бос жұ­мыс орнын ұсынып отырғанын жеткізді. Сонымен қатар об­лыс­­­қа қарасты барлық аудан­дардың өкілдері де өздеріндегі бос жұмыс орындары барын айтып, жұмыс іздеушілерге ақыл-кеңес беріп, байланыс нөмірлерін алмасты.

– Тәрбие жұмысын ұйым­дастыру мамандығы бойынша оқу орнын бітіріп жатырмын. Бү­гінгі бос жұмыс орындары жәр­меңкесіне жұмыс іздеп келдім. Егер өзіме қолайлы жұ­мыс табыл­са, істеуге да­йынмын. Әзір­ге бірнеше жұмыс беру­­ші­мен сөйлестім. Тағы да бас­қа жұ­­мыс ұсынушылармен сөй­ле­се келе таңдау жасаймын, – дей­ді кол­ледж түлегі Карина Мұ­рат­қызы.

Айта кетерлігі, ашық платформада жұмыс берушілер өз компанияларымен таныс­тырып, керекті маман иелері бойынша кандидаттардың жеке базасын қалыптасты­руды ойға алған. Ондағы мақсат – облысымыздағы маман тапшылығын реттеп, жұмыссыздар қатарын азайту көзделген.

Сөйтіп, Өскеменде бірінші рет Жұмыспен қамту және әлеуметтік бағдарламаларды үйлестіру басқармасы, еңбек мобильділігі орталығы, қала­лар мен аудандардың мансап орта­лықтары, жергілікті атқару­шы органдарымен, жұмыс берушілермен бірлесе отырып жұмыс іздеп жүрген адамдар, жастар, жоғары оқу орындары, колледж түлектері үшін «Шығыс маманы» жұмыс ұсыну облыстық платформа ұйымдастырып, өткізді.

Іс-шараның негізгі мақсаты жұмыс берушімен тікелей байланыс платформасын құру арқылы жұмыссыз азаматтарды, білім беру ұйымдарының түлектерін және жастарды жұмысқа орна­лас­­тыруға жәрдемдесу еді.

 

Шығыс Қазақстан облысы