Ақтөбеде мәслихат депутаттары қоғамдық қабылдау жүргізді

АҚТӨБЕ. 11 маусым. Ақтөбе облыстық мәслихатының депутаттары Әнуар Тасымов пен Дмитрий Довматенко «Жас Отан» жастар қанатының «Жастар – Отанға!» партиялық жобасы аясында қоғамдық қабылдау жүргізді. Бұл туралы egemen.kz тілшісі хабарлады. Қаланың орталық базарында орналасқан «Кеңес беру орталығында» өткен шарада жастардың өзекті мәселелері тыңдалып, кеңес берілді. «Нұр Отан» партиясының «Сәтті қадам» жобасы және жастарға қажетті мемлекеттік бағдарламалар бойынша түсіндіру жұмыстары жүргізілді. «Жас Отан» жастар қанаты кеңес беру орталығының кеңесшісі Ислам Исенғазиевтың айтуынша, орталыққа жұмыспен қамтуды үйлестіру және әлеуметтік бағдарламалар басқармасының, «Тұрғын үй құрылыс жинақ банкінің» және Қаржы министрлігі мемлекеттік кірістер комитетінің Ақтөбе облысы бойынша департаменті мамандары, жастар ұйымдарының өкілдері, медицина қызметкерлері келіп, халыққа өз салалары бойынша кеңес беріп келеді. Осындай шараның арқасында жыл басынан бері 150-ге жуық адам кеңес алған. Сатыбалды Сәуірбай. Дерек: egemen.kz. Сурет: kub.kz.