Шығыс өңіріне «Шинхан Банк Қазақстан» жетекшісі келді

ӨСКЕМЕН. 11 маусым. Шығыс Қазақстан облысының әкімі Даниал Ахметов «Шинхан Банк Қазақстан» акционерлік қоғамы басқарма төрағасы Чой Менг Кюмен кездесті. Бұл туралы egemen.kz тілшісі хабарлады. Облыс әкімдігі инвесторларға негізінен өңірдің ірі екі қаласына арналған бірқатар инвестициялық және концессиялық жобаларды ұсынып отыр. Оның ішінде Өскемен мен Семей қалаларында инвестиция тарту арқылы балабақша, денсаулық сақтау мекемелері, муниципальды автопарк құру және көшелерді электр энергиясын үнемдейтін шамдармен жаңалау сынды жобалар бар. Сондай-ақ, Күршім ауданындағы Бұқтырма су қоймасымен өтетін көпір өткелінің құрылысы да сөз болды. Өңір басшысы Қазақстан Республикасының «Инвестициялар туралы» Заңына сәйкес инвестициялық басым жобалардың тиімділіктері жөнінде әңгімеледі. «Шинхан Банк Қазақстан» АҚ – қаржы қызметі нарығында ұсынылатын банк операцияларының барлық түрлерін жүзеге асыратын әмбебап банктердің бірі. Оның акционері – әлемдегі ең ірі банктердің санатына енетін Корея Республикасындағы Shinhan Bank екенін де айта кеткен ләзім. Думан Анаш. Дерек: еgemen.kz. Сурет: Шығыс Қазақстан облысы әкімдігінің баспасөз қызметі.