фото:qazaquni.kz
Депутаттар С.Асфендияров атындағы Қазақ ұлттық медицина университетінің құрамына кіретін Ақсай балалар орталығына барды. Бұл – 70 жылдық тарихы бар ең байырғы көпсалалы балалар емдеу-диагностикалық мекемелерінің бірі.
Кейінгі жылдары клиниканың техникалық базасы кейбір медициналық жабдықтар ішінара жаңартылды, мамандар шетелде біліктілігін арттырды.
Алайда шешімін таппай тұрған өзекті мәселе – кеңес заманынан қалған ескі ғимарат.
– Бұл жерде жоғары білікті мамандар жұмыс істейді. Біз бұл емхананы жөндеуге қаржы бөлу туралы мәселені көтереміз, – деді «Respublica» фракциясының мүшесі, Мәжіліс депутаты Нұргүл Тау.
Ал депутаттардың қалалық кардиология орталығына ат басын бұруына ондағы медициналық қызметкерлерді жұмыстан шығаруға байланысты ұжымдық өтініш себеп болды. Орталықтың бас директоры Роза Қуанышбекованың айтуынша, мекеменің қомақты дебиторлық берешегі болған. Алайда қазір жағдай өзгеріп, табыс табу мүмкіндігіне ие болды.
Қазақстан Халықтық партиясынан сайланған Мәжіліс депутаты Гаухар Танашева атап өткендей, сайлаушылар өтініші назардан тыс қалмайды және қызметкерлер заңсыз жұмыстан шығарылған жағдайда міндетті түрде тиісті шаралар қабылданады.
