Операция әлі дүниеге келмеген нәрестенің денсаулығы мен өмірі туралы көрсеткіштерін жақсартуға мүмкіндік беретін жағдайларда жасалады. Ұрық хирургиясы – елімізде қолға алынып жатқан медицинаның мүлдем жаңа бағыты. Ұрық медицинасы, яғни фетальды хирургия – бұл медицинаның құрсақтағы шарананы емдейтін жоғары мамандандырылған саласы. Бұл хирургия зақымы аз процедуралар арқылы жатырға біткен баланың патологиялық ауытқуларын ерте бастан түзетіп, емдеуге мүмкіндік беретін инновациялық технологияларға негізделген.
Отандық денсаулық сақтау саласына серпін беретін жоба Денсаулық сақтау министрлігі мен «Ayala» қайырымдылық қорының қолдауымен қолға алынғанын айта кеткен жөн.
Нәрестелердің туабітті кеселдерін азайтуға күш салып отырған Алматыдағы Перинатология және балалар кардиохирургиясы орталығында ұзақ жыл бойы ұрық операцияларын табысты жүзеге асырып жүрген Ресейдегі жетекші «Ана мен бала» медициналық орталығының хирургтері – Марк Курцер мен Наталья Косовцова, Екатеринбург қаласындағы ана мен баланы қорғау ҒЗИ хирургі Андрей Бугеренконың қатысуымен Қазақстандағы алғашқы жатырішілік патологияны түзету бойынша практикалық шеберлік сағаты өтті.
«Министрлік балалардың мүгедек болып тууын төмендетуді басты міндет деп санайды. Осы мақсат жолында ұрық хирургиясы – әлемдегі ең маңызды құралдардың бірі. Біз кейінгі 30 жылдың ішінде ұрық операциялары саласы бойынша озық әлемдік тәжірибелерді талдадық. Бұл білімнің барлығы Қазақстанда алғаш рет әзірленген ұрық хирургиясының стандарттарына негіз болды. Перинатология және балалар кардиохирургиясы орталығының (Алматы), UMC (Астана) дәрігерлерінің бригадалары Қазақстанда және шетелде ұрық хирургиясы бойынша ұзақмерзімді күрделі теориялық және практикалық дайындықтан өтті. Сондықтан отандық денсаулық сақтау саласы үшін бұл – аса маңызды күн», деді Денсаулық сақтау министрі Ақмарал Әлназарова.
Қазақстанда ұрық хирургиясын іске қосуға дайындықты Денсаулық сақтау министрлігі екі жыл бойы жүргізіп, бұл бастамаға Алматыдағы Перинатология және балалар кардиохирургиясы орталығы мен Астанадағы UMC КҚ-ның дәрігерлер тобы таңдалды.
Денсаулық сақтау министрлігі мен «Ayala» қайырымдылық қоры ұрық хирургиясы бойынша дәрігерлердің шетелдік емханаларда жеке оқуын ұйымдастырып, оннан аса практикалық шеберлік сабақтары мен семинарларға қатысуын қамтамасыз етті. Сонымен қатар қор өткен жылы дәрігерлердің Испанияда өткен дүниежүзілік ұрық хирургиясы конгресіне сапарын ұйымдастырған.
«Қазақстанда балалардың мүгедек болып тууын азайту –«Ayala» қорының басты міндеттерінің бірі. Біз елімізде ұрық хирургиясын іске қосып, қалыптастыруға көмектескенімізді мәртебе тұтамыз. 29,3 млн теңгеден аса сомаға Перинатология және балалар хирургиясы орталығындағы ұрық хирургиясы бөлімшесін арнайы медициналық құралдармен – лазер, фетоскоптармен жабдықтауға көмектескен сенімді серіктесіміз «Gasenergy» компаниясына да алғыс айтамыз», дейді «Ayala» қайырымдылық қорының негізін қалаған әрі президенті Айдана Сүлейменова.
Ал Алматы қаласындағы Перинатология және балалар кардиохирургиясы орталығының директоры Гүлнәр Нұрланованың айтуынша, мамандарымыз Израиль, Ресей, Испания, Беларусь, Португалия сияқты елдерде білім алып, жаңа технологияларды дайындау мен игеруде үлкен жұмыс атқарды. Жатырішілік ауытқуларды емдеуде жылына шамамен 150-ге жуық операция жасалады деп жоспарланып отыр. Ұрық хирургиясы жобасы ана мен балаға көрсетілетін медициналық көмектің сапасын жақсартудағы жаңа кезеңі болмақ.
Сондай-ақ таяу күндері «Ayala» қорының қолдауымен Астанада UMC базасында медицина ғылымдарының докторы, International Fetal Medicine and Surgery Society (IFMSS) мүшесі Наталья Косовцованың қатысуымен ұрық хирургиясы бойынша алғашқы практикалық шеберлік сабағы өткізілмек.
Қазір ағзаға зақымы аз эндоскопиялық (фетоскопиялық) операциялар ашық хирургияны алмастырып отырғанын айту ләзім. Өйткені мұндай операциялар ана мен жатырдағы шарана үшін қауіпсіз. Әлемнің талай елінде құрсақішілік емдеуге жататын ұрық аурулары аясы жылдан-жылға толығып, жаңа технологиялар әзірленіп, жетілдіріліп жатыр. Туабітті жүрек кеселдері, диафрагма жарықтары мен ОЖЖ ауруларына құрсақта жатқан кезінде емдеу шаралары белсенді түрде енгізіліп, жақсы нәтижелер бере бастағаны қуантады.
АЛМАТЫ
