Индустрияландыру іс үстінде
Бұл ойы отбасы тарапынан қолдау тапқаннан кейін тоқырауға ұшыраған зауыттың бір ғимаратын жалға алды. Сөйтіп, майлы сырдың бір партиясын шығарып, жергілікті тұтынушыларға жөнелтті. Алғашқы аяқ алыс күткендегідей нәтиже беріп, шетелдік қондырғылар сатып алына бастады. Серіктестіктің негізгі өндірістік базасы облыс орталығындағы көпқабатты ғимаратта орналасып, ондағы цехтарда жүгері таяқшаларын, дәмді попкорн шығаруға басымдық берілді. «Добрая», «Император» деген атауларға ие 2, 5, 10 килолық орамалардағы жоғары, бірінші сұрыпты ұн өнімдері жоғары сапалығымен ерекшеленді.
Кәсіпорын Қызылжар ауданында иесіз қалған ғимаратты сатып алу үшін мемлекеттің қаржылық қолдауына жүгінді. Екінші деңгейлі банктен алынған несиеге күрделі жөндеу жүргізіліп, 50, 100, 150, 200 грамдық салмақта жылтыр орамада қуырылған «Добрая» шекілдеуігін шығаратын цех ретінде жабдықталды. Содан бері бұл өнімге деген сұраныс еш үзілген емес. Бір айдағы өнім көлемі 50-60 миллион теңгені құрайды. Оның жанынан кеңсе, мәжіліс залдары, 30 орындық асхана, шағын қонақ үй ашылды.
Бүгінде лак және сыр материалдарын саудалаумен айналысатын қазақстандық өндірістік-сауда компаниясы көпсалалы бағыт ұстанып, еліміздің 12 қаласында бөлімшелерін аша білді.
Өнімнің 40 түрі шығарылады
1997 жылы Анатолий Михайлович өркен жайған бизнес саласын ұлдары Дмитрий мен Петрге тапсырды. Бұлар болса, әке аманатын бұлжытпай орындауға бар күш-жігерлерін жұмылдырып, сәтті дамытып келеді. Өз қаражаттарына Бескөл кентінде жаңа ғимарат тұрғызып, таттанбайтын ақ қаңылтырмен қаптаған соң полимерлі тұрмыс қалдықтарын өңдеп, пластмасса бұйымдарын шығаратын үшінші өндіріс ошағына айналдырды. Бұған дейін Петропавл ауыр машина зауытынан сатып алынған ескі қондырғылар қолданылып келсе, енді уақыт талабына орай озық технологиялармен жабдықтау қажеттігі туды. Сол себепті, Қазақстан Халық банкі арқылы миллион АҚШ доллары мөлшерінде несие алынып, «Полимерлерді қайта өңдеуге арналған өндірісті жаңғырту» жобасы жүзеге асырылды. Қаржы бірінші кезекте полимер өнімдерін шығаратын шетелдік заманауи станоктар орнатуға және автокөлік паркін жаңалауға жұмсалды.
Ағайынды кәсіпкерлердің тың бастамасы «Бизнестің жол картасы-2020» бағдарламасы шеңберінде де қолдау тауып, 25,5 миллион теңге демеуқаржы берілді. Осылайша шикізатқа тәуелділіктен де біржола құтылды. Қазіргі күні жергілікті жерлерде сатып алынатын және еліміздің өзге өңірлерінен әкелінетін тұрмыс қалдықтарын кептіріп, өңдейтін қуатты желі жұмыс істейді. Ал, дайын полимер түйіршіктері алуан түске боялып, шикізат ретінде қолданылады. Екіжақты келісімге орай Ресейдің бірқатар аймақтарына экспортталады. Бүгінде мұнда 40-қа жуық бұйым түрлері әзірленеді. Олардың арасында тұрмыстық шелектер, киімілгіштер, түрлі-түсті төсеніштер, балалар, балықшылар шаналары, биодәретханалар секілді үлкен сұранысқа ие өнім түрлері бар. Өнімдердің арзан болуына жергілікті шикізатты пайдалану әсер етсе, екіншіден, полимерлерді екінші қайтара өңдеуге арналған өндірістің іске қосылуы айтарықтай ықпал жасағанын аңғару қиын емес.
Жаңалыққа жаны құштар Шарапаевтар негізгі өндірістік базаға компьютермен басқарылатын германиялық «Heizomar» қазандығын орнатып, көл-көсір рахатын көріп отыр. Отын ретінде ағаш қалдықтары мен жаңқалар пайдаланылады.
Серіктестік ірі кәсіпкерлік субъектілер арасында «Экологияға қосқан үлесі үшін» аталымында «Парыз-2014» бизнестің әлеуметтік жауапкершілігі байқауының қола жүлдегері атанса, Д.Шарапаев «Ерен еңбегі үшін» медалімен марапатталған.
Экспорт – басты бағдар
Қазақстаннан тысқары аймақтарға да «Добрая рать» сауда маркасы брендімен танымал «Радуга» ЖШС-де бүгінде 1500 адам тұрақты жұмыспен қамтылған. Тауарлық-қаржылық айналымы 2013 жылы 7 миллиард, 2014 жылы 10,5 миллиард теңгені құраған. Былтыр 1,3 миллиард теңгенің өнімін өндіріп, алдыңғы жылға қарағанда 1,5 есе өскен. Биыл бұл көрсеткішті 2,5 миллиард теңгеге жеткізу белгіленген. Компания дистрибьюторлық жүйе арқылы өнімдерін еліміздің барлық өңірлеріне, сондай-ақ, Ресейдің көп бөлігіне таратады.
Жуырда компанияның Бескөл филиалында тұрғын үй-коммуналдық шаруашылық және халық тұтынатын тауарлар шығаруға арналған жаңа кешен Индустрияландыру картасы шеңберінде пайдалануға берілді. Оның ашылу салтанатына облыс әкімі Ерік Сұлтанов қатысып, пластмасса бұйымдары, түтікті темір өнімдері, полиэтилен құбырлары, қалташалар мен баулы қапшықтар өндіретін кешенді іске қосты.
– Мемлекет басшысы Н.Назарбаев Қазақстан экономикасының 6 пайыздық өсімін қамтамасыз ету үшін жыл сайын 10 мың жаңа жұмыс орнын ашу талабын жүктеген болатын. Осыған орай өңірде индустриялық-инновациялық даму мемлекеттік бағдарламасының екінші бесжылдығына 100 миллиард теңгенің 70-ке жуық жобасы енгізілді. Олардың арасында 10 миллиард теңге болатын Тайынша қалайы комбинаты секілді ірі жобалар бар. ҮИИДБ барлық аудандарда жүзеге асатын болады. Солардың ең алғашқысы ретінде полиэтиленнен 40-шақты өнім түрлерін алатын кәсіпорын бой көтеріп, 40 адамға жұмыс тауып беріп отыр. Пластмассаға керекті шикізаттың осындағы тұрмыстық қалдықтардан өндірілетіні жобаның басты артықшылығы деуге болады, – деді БАҚ өкілдеріне берген сұхбатында Ерік Хамзаұлы.
Одан кейін филиалдың түтік металдардан екі түрлі балалар шанасын, киім-кешек үтіктейтін тақта, үш түрлі киім-кешек кептіргіш, саты, кеңселік орындықтар сияқты халық кең тұтынатын тауарлар мен бұйымдар жасайтын цехта болды.
Компанияның бас директоры Дмитрий Шарапаевтың айтуынша, филиалға «Бизнестің жол картасы-2020» бағдарламасы бойынша 1,5 миллиард теңгенің құрал-жабдықтары орнатылып, өнім түрлері екі есе көбейген. Жаңа жылдан бастап өз күшіне енген Еуразиялық экономикалық одақ өзара тиімді әріптестік байланыстарға, қолайлы келісімшарттарға, тауарлардың үзіліссіз экспортталуына кең жол ашатын болады. «Добрая рать» брендімен жұмыс істейтін компанияда тауар логистикасы, брендменеджерлер, маркетинг қызметтерінің қуатты жүйесі қалыптасқан. Алдағы уақытта полимерлі тұрмыс қалдықтарын жинауға арналған орама жасау, тауар түрлерін көбейту, қосымша сауда орындарын ашу, экспорт үлесін арттыру белгіленген.
Өмір ЕСҚАЛИ,
«Егемен Қазақстан».
Солтүстік Қазақстан облысы.
