Осыдан оншақты жыл бұрын «Талдықорған – таза қала» акциясы қолға алынып, жыл сайын дәстүрлі түрде тұрғындар ауласын ретке келтіріп жүрді. Бұл үрдіс кейіннен әдетке айналды. Содан да болар облыс орталығы ел ішіндегі таза шаһарлар қатарынан түскен емес. Оның үстіне қала басшысы Ернат Бәзіл таңнан аралап, көшелердің тазалығына баса мән беріп отыр.
«Әрбір тұрғын қаланы Ольга ханым секілді аялап, есік алдына гүл егіп, ағаштарды суғарып тұрса, қаланың көркі одан әрі жайнар еді. Біз тазалықты өзімізден бастамай, қаланы қоқыстан құтқара алмаймыз. Жыл сайын тұрғындар саны артып келеді, үйлер де жиі салынып жатыр. Олардан шығатын қатты қалдықтар да көбейеді. Сондықтан барынша әрбіріміз қаланы аялай білуіміз қажет. Қоқыстан арнайы жәшіктерге тастап, ауланың сәндеп отырғанымыз абзал», дейді Е.Бәзіл.
Шынында Ольга ханымға қарап, көпқабатты үйдің де алдын баққа айналдыруға болады деген ойға келесіз. Себебі жұпар аңқыған таңғажайып гүлдер көрген кісінің көңілін баурайды. Оған ешкім сол гүлдерге бағбан болғаны үшін ақы төлемейді. Жыл сайын көктем бастала баласындай қарап, үнемі қадағалап отырады. Қыс келгенше жайнап тұрады.
Кейіпкеріміз гүлдерін ауладағы балалар жұлып алмауы үшін көз жазбауға тырысады. Алақандай жерге осыншама мейірімін төккен жанға қала басшылығы да дән риза болып отыр. Әр гүлге жан жылуын, көңіл шуағын қоса құйып, өзгелерге де осындай иігілікті істі қолға алуға шақырады. Он бір жыл ішінде әуесқой бағбан жүздеген түрлі гүл өсіріп келеді. Оның өз туған жері мен өз қаласына деген сүйіспеншілігі көпке үлгі болып отыр. Мұндай игі іс бос жатқан жер учаскесін тиімді пайдалансақ деген ниеттен басталған еді.
«Медицина саласында жұмыс істедім, зейнеткерлікке шыққаннан кейін бос уақытым көбейді, сосын гүл өсірумен айналыса бастадым. Әртүрлі гүл өсіремін. Шырайгүл, түймедақ, балшатыр, бақытгүл, астра, барқытгүл, қоңыраугүл басқа да көптеген түрі бар. Ал бөртегүл көктемде гүлдейді. Жалпы, гүлдің 60-тан астам түрі бар. Әсіресе тас раушан – өте ерекше гүл. Өз қолыммен гүлзар жасадым. Басқа да гүл өсірушілермен араласып тұрамын. Біз бір-бірімізбен тәжірибе алмасамыз, бір-бірімізге көшет, тұқым береміз. Өз қолымызбен оазис жасап отырмыз, соны күтеміз, суарамыз. Әрі әдемі, әрі пайдалы. Көршілерге ұнайды, олар бізге қолдау көрсетеді, бірге қуанады, балалар да гүлге ұқыпты қарайды», дейді зейнеткер бағбан.
Осы ретте тағы бір тұрғынның игі ісін айтпаса болмас. Ол да ауласын көгалдандырумен 15 жылдан бері айналысып келеді. Татьяна Ибрагимова 50 сотық жерге үлкен гүлзар жасап, жеміс ағаштарын өсіріп отыр. Ләззат Асанова көшесіндегі №69 көпқабатты үйдің ауласын гүлді баққа айналдыруға оның қанша тер төккенін гүлзарға қарағаннан-ақ ұғыну қиын емес. Гүл өсірушінің өзі мұнымен шектелмейтінін айтады, туған қаласына деген сүйіспеншіліктің ерекше үлгісін көрсетіп, гүлдің жаңа сорттарын отырғызуды жалғастырмақшы. Талдықорған қаласы әкімдігінің мәліметіне сүйенсек, биыл облыс орталығында «Үлгілі аула» байқауы өтеді. Ондағы басты мақсаты – қаланың кескін-келбетін жақсарта түсу, аулалардың таза, әрі жинақы болуын насихаттау. Осы арқылы әрбір тұрғынның шаһарға деген құрметі артпақ.
«Аула аумақтарының санитарлық жағдайы мен көгалдандырылуын, абаттандырылуын қолға алу үшін арнайы іс-шаралар жүзеге асады. Тұрғындарды бірлесе жұмыс істеуге шақырып, ауласын таза ұстауға жол ашуымыз қажет. Осындай тұрғындарды үлгі ете отырып, өзгелерді де осындай іске қызықтыра аламыз», дейді қала әкімінің баспасөз қызметі.
Жетісу облысы
