Екі ел арасындағы ықпалдастық келісіміне қол қою рәсімі Қытай Халық Республикасының президенті Си Цзиньпиннің Қазақстанға ресми сапары аясындағы негізгі оқиғалардың бірі болды. Келісім екі ел арасындағы ғылыми байланысты нығайтуға және бірлескен зерттеулер жүргізуге бағытталып отыр.
Салтанатты іс-шараға Шэньчжэнь университеті медицина факультетінің атқарушы деканы профессор Синчжи (Ксавьер) Сюй, Президент жанындағы ҰҒА президентінің міндетін атқарушы Ляззат Ералиева, С.Асфендияров атындағы Қазақ ұлттық медицина университетінің басқарма төрағасы-ректор Марат Шоранов, ҚХР Алматыдағы Бас консулы Цзян Вэй, сондай-ақ «Өмір және денсаулық туралы ғылымдар» саласындағы жетекші ғалымдар қатысты.
Алматы қаласындағы ҚХР Бас консулы Цзян Вэй құттықтау сөз сөйлеп, мемлекетаралық ынтымақтастық мәселесіне тоқталып өтсе, ҰҒА президентінің міндетін атқарушы Ляззат Ералиева академияның қызметі, жаңа құрылып жатқан зертхана туралы ақпарат берді. Шэньчжэнь университеті ғылыми қызметінің нәтижелеріне профессор Синчжи (Ксавьер) Сюй тоқталып, халықаралық жобалардың маңызы туралы айтты. 1983 жылы іргетасы қаланған Шэньчжэнь университеті биомедициналық инженерия және биология бойынша PhD мамандарын даярлайды. USNews әлемдік рейтингінде өзіндік орны бар оқу орнында бүгінде 250-ден астам халықаралық оқытушы жұмыс істейді.
Шэньчжэнь – Алматы медицина ғылымдарының алдыңғы қатарлы зертханасының бір филиалы Алматы қаласындағы Ұлттық ғылым академиясында, ал екіншісі Шэньчжэнь университетінде орналасады. Бірлескен ынтымақтастық аясында табиғи өнімдерден дәрілік препараттар әзірлеуді, геном зерттеулерін, инфекциялық иммунитет пен қабынуды, сондай-ақ медициналық жабдықтарды әзірлеу жоспарланып отыр. Алғашқы зерттеулер «Фитошикізат негізінде жаңа дәрілік кандидаттардың көпмақсатты әзірлемесі» жобасымен басталмақшы.
Салтанатты рәсімде, сонымен бірге Ұлттық ғылым академиясы, Шэньчжэнь университеті және С.Асфендияров атындағы ҚазҰМУ арасындағы үшжақты меморандумға қол қойылды. Меморандум академиялық және медициналық мекемелер арасындағы байланысты нығайтуға, бірлескен ғылыми зерттеулер жүргізуге, білім мен тәжірибе алмасуға, сондай-ақ білім беру бағдарламаларын, жобаларын іске асыратын тың бастамаларға серпін береді.
АЛМАТЫ
