Елімізде демалыс күндері аяз күшейеді

АСТАНА. 21 қаңтар. Қазақстанда алдағы демалыс күндері үскірік аяздар күшейеді. Бұл туралы «Қазгидромет» орталығы хабарлады. Синоптиктердің айтуынша, арктикалық ауа массаларында қалыптасқан антициклонның әсері Батыс Сібір мен Оралға ғана емес, Қазақстан аумағына да таралуда. «Жақын арадағы тәулікте күннің сууы республиканың батыс және солтүстік-батыс аудандарын қамтиды, одан соң барлық аумаққа таралатын болады. Антициклонның күшеюімен температура төмендейді, еліміз солтүстігінің кей жерлерінде ауа температурасы -33-38, күндіздің өзінде -20-30 градус аяз болады деп болжанады», – делінген орталық хабарламасында. Сонымен қатар, оңтүстік облыстарда жақын арадағы үш тәулік ішінде бұлтты, қарлы ауа-райы сақталып, 24 қаңтар күні түнде -18-23 градусқа дейін, кей жерлерде -25-30 градус аязға дейін төмендейді деп күтілуде. Айдар Өрісбаев. Дерек: kazhydromet.kz. Сурет: nur.kz.