10-11 маусымда «Қазақстан теміржолы» ҰК» АҚ президенті Асқар Мамин бастаған Қазақстан теміржолшыларының делегациясы жұмыс сапарымен Үндістанда болды. А.Мамин Үндістанда болған кезінде осы ел теміржол, су жолы және автожол министрліктерінің басшылығымен бірқатар екіжақты кездесулер өткізді, деп хабарлады «ҚТЖ» ҰК» АҚ-тың баспасөз қызметі.
Кездесулер кезінде «Солтүстік – Оңтүстік» дәлізін есепке ала келгенде, екі ел арасындағы көлік әлеуетін айқындау мәселелеріне және Үндістан мен Еуразия құрлығының аса ірі рыноктары арасындағы тауар ағынын қамтамасыз ететін тиімді логистикалық тізбек құрудың мүмкіндіктерін қарастыруға баса назар аударылды. Мәселен, Асқар Маминнің Үндістанның Су жолы және автожол министрі Нитин Гадкаримен және Темір жол министрі Суреш Прабхумен кездесулері кезінде екі ел арасындағы көліктік ынтымақтастықты дамытудың перспективалары талқыланып, «Солтүстік – Оңтүстік» көлік дәлізінің бір бөлігі ретінде «Қазақстан – Түрікменстан – Иран» теміржол дәлізінің зор әлеуетін пайдалану арқылы тауарлар қозғалысын жеңілдетуге жағдай туғызатын уағдаластықтарға қол жеткізілді. Бұдан бөлек, 80-нен астам өнеркәсіптік және көліктік қауымдастықтардың басын біріктіретін Үндістанның Сауда-өнеркәсіп палатасы федерациясының офисінде осы ел бизнес-топтары үшін өңірде экспорттық-импорттық операцияларды жүзеге асырудың логистикалық мүмкіндігіне арналған тұсаукесер өткізілді. Мундра теңіз портында болған кезінде Қазақстан теміржолының делегациясы даму жобаларымен танысып, ірі логистикалық компаниялармен келіссөздерге қатысты.
Сурет: alashainasy.kz
