«Бұл күнді ерекше тебіреніспен күттім»

АТЫРАУ. 26 сәуір. Атырау жұртшылығы дауыс беруде ерекше белсенділік танытуда. Әсіресе, жастардың өз таңдауын жасауға асқан жауапкершілікпен қарағаны көңіл қуантады. Сондай жастардың бірі, Халел Досмұхамедов атындағы Атырау мемлекеттік университетінің 2-курс студенті Гүлдана Елемесова сайлау болатын күнді ерекше тебіреніспен күткенін айтты Бұл туралы egemen.kz хабарлады. «Бұл күнді мен ерекше бір толқыныспен күттім. Өйткені, биыл 26 сәуірдің мен үшін екі ерекшелігі бар. Біріншіден, мен де замандастарым секілді сайлауда алғаш рет дауыс беріп, өз таңдауымды жасайтын мүмкіндікке ие болдым. Сөйтіп, өркениетті елдер қатарынан орын алып, қуатты мемлекет ретінде қалыптаса бастаған сүйікті Отаным – Қазақстанның жарқын келешегі үшін дауыс бердім», – дейді Гүлдана. Еліміздегі саяси тұрақтылыққа, татулық пен достыққа тоқталған жас сайлаушы отандық өндірістің кең қанат жайғанын және жаңа технологиялар мен осы заманғы құрал-жабдықтарды өзіміз шығаруға қол жеткізгенімізді тілге тиек етті «Президент сайлауы 26 сәуірге тағайындалғанын естігенімде қатты толқыдым, әрі қуандым. Өйткені, бұл күн – менің туған күнім. Жыл сайын жарық дүниеге қадам басқан атаулы күнімді тағатсыздана тосушы едім. Ал биыл Президент сайлауымен тұспа-тұс келгендіктен бұл күнді ерекше бір тебіреніспен күттім. Сол себепті де, биылғы туған күнім өмірімде ерекше есте сақталатын болды», – дейді ел болашағына бей-жай қарамаған қарындасымыз. Жолдасбек Шөпеғұл. Дерек, сурет: egemen.kz.