Таратып айтқанда, тасқыннан Ақтөбе қаласында – 200, Ойыл ауданында – 307, Ырғыз ауданында –160, Қобда ауданында – 155, Мұғалжар ауданында – 69, Темір ауданында – 57, Әйтеке би ауданында 51 тұрғын үй тұруға мүлде жарамсыз болып қалды. Сондай-ақ Байғанин ауданында – 8, Мәртөк ауданында – 5, Алға ауданында 2 үй қирап қалды. Ақтөбе қаласында үйі суға кеткен 200 отбасыға жаңа пәтер сатып алуға шешім шығарылса, 138 отбасы жаңа пәтерлерге кіріп үлгерді. Ойыл ауданында – 130, Мұғалжарда – 55, Темірде – 36, Ырғызда – 35, Әйтеке би ауданында – 25, Байғанин ауданында – 8, Қобда ауданында – 8, Мәртөкте – 5, Алға ауданында 2 баспана сатып алынды.
Ойыл ауданының Қаратал елді мекенінде су тасқыны кезінде 210 тұрғын үй, мәдениет үйі, балабақша, кітапхана бүлінді. Комиссия ұзақ уақыт судың астында тұрған ауылдағы әлеуметтік нысандарды қайта қалпына келтіру мүмкін емес деген қорытындыға келді. Қаратал ауылында мамырдың соңынан бастап 11 мердігер 120 үйдің құрылысын бастады. Бүгінде салынып жатқан 120 үйдің қабырғалары көтеріліп, 65 үйдің шатыры жабылса, 30 үйде ішкі әрлеу жұмыстары жүріп жатыр. Жаңа баспананың салынуын күтпеген осы ауылдағы 60 отбасыға аудан орталығы Ойылдан дайын үйлер сатып алынды. Ырғыз ауданының Нұра ауылында тұрғын үй құрылыстары кешеуілдеп басталды. Күзге дейін осы ауылдағы құрылыс жұмыстары аяқталмай қалуы мүмкін.
Су тасқынынан өңірде 69 кәсіпкерлік нысаны зардап шекті. Тасқын кезінде шағын және орта кәсіпкерлік нысандарына келтірілген мүліктік шығындардың өтемақысын анықтау жөніндегі өңірлік комиссияға 22 кәсіпкер арызданса, 17 кәсіпкерге 230,7 млн теңге сомасында өтемақы төлеу туралы шешім шығарылды. Соның ішінде ең көп зардап шеккен Ақтөбе қаласы мен Темір ауданында орналасқан 6 кәсіпкерлік нысанына 63,5 млн теңге көлемінде өтемақы төленетін болды. Ырғыз ауданы бойынша кәсіпкерлер шығындары әлі түгенделіп болған жоқ. Дүние-мүлкі, ғимараты бүлінген кәсіпкерлердің өтемақы алуға байланысты өтініштері осы жылдың 30 қарашасына дейін қабылданады.
Ақтөбе облысы
