Фото: olympic.kz
Азия ойындары мен құрлық чемпионатында жүлде алып жүрген Моңғолияның еңселі қызына оның әлі жетпеді. Бұл салмақта әлемде үш рет жүлде алып, өз құрлығында қарсылас шыдатпай жүрген бразилиялық Беатрис Соузаның бағы жанды. Финалда ол израильдік Раз Гершконы жолынан ығыстырды. Үшінші орынды франциялық Романе Дикко мен оңтүстіккореялық Ким Каюн иемденді. Ерлер арасында аса ауыр салмақта Тедди Ринерге тең келер ешкім табылмады. Олимпиаданың ашылу рәсімінде алқызыл алауы тұтандырған Францияның атағы жер жарған алыбы шешуші тұста биылғы әлем чемпионы Ким Минджонның тас-талқанын шығарды. Тәжік Темур Рахимов пен өзбек Әлішер Юсупов қола медальды еншіледі.
Одан кейін командалық сайыстарды тамашаладық. Қазақстан құрамасы бастапқы бәсекеде Бразилиямен айқасты. Алғашқы болып татамиге шыққан Әбиба Әбужақынова өзінен жоғары екі салмақта өнер көрсететін Силва Рафаэламен күресті. Бұл белдесу Олимпиада мен дүниежүзілік доданы екі рет ұтқан 32 жастағы әккі дзюдошының пайдасына шешілді. Келесі кездесуде Данияр Шамшаев Даниел Карниннен жеңіліп жатып, бәсеке бел ортадан ауған тұста жеңісті қарсыласының уысынан жұлып әкетті. Токио Олимпиадасы мен Ташкенттегі әлем чемпионатында үздік үштікті түйіндеп, Панамерика біріншілігінде үш рет топжарған жампоз қазақ балуанының «қақпанына» қалай түскенін өзі де аңғармай қалды. Үшінші болып Есмигүл Куюлова өнер көрсетті. Осыдан бақандай 16 жыл бұрын Бейжің Олимпиадасында қола медальды иеленген 36 жастағы ардагер спортшы Кетлин Кудросқа 22 жастағы қазақ қызының әлі жетпеді. Абылайхан Жұбаназар өжеттігімен өз құрлығының мықтысы Рафаэл Маседоны тізе бүктірді. Осы орайда қандасымыздың 81, ал бразилиялықтың 90 кг салмақ дәрежесінде өнер көрсететінін де ескерген жоқ. Бірақ одан кейін Кәмила Берліқаш Париж Олимпиадасының жеңімпазы Бетарис Соузадан, Нұрлыхан Шархан Леонардо Консалвестен ұтылды. Сөйтіп, Қазақстан жарыс жолынан шығып қалды. Командалық сайыстың финалында Франция Жапонияны 4:3 есебімен ұтса, қола медаль Канада мен Бразилияға бұйырды.
