АЛМАТЫ. 12 маусым. Ақсу-Жабағылы мемлекеттік қорығы ЮНЕСКО-ның дүниежүзілік биосфералық қорықтары тізіміне енді. Маусым айының 8-12 аралығында Парижде өткен ЮНЕСКО-ның "Адам және биосфера" бағдарламасы үйлестіру кеңесінің кезекті отырысы осындай шешімге келді. Бұл туралы newtimes.kz хабарлады.
Осылайша Дүниежүзілік биосфералық қорықтар тізіміне әлемнің 10 мемлекетінен жаңадан 20 нысан қосылды. Ақсу-Жабағылы қорығы батыс Тянь-Шань тауында, Қаратау қаласынан оңтүстікке қарай орналасқан, аумағы 357 мың гектардан асады. Қорықта барлық құстардың 48 пайызы мен омыртқалы жануарлардың 72,5 пайызы мекендейді. ЮНЕСКО түсіндірмесінде "Қорық әлемдегі құстарды бақылауға ең қолайлы жерлердің бірі саналады және экотуризмді дамытуға әлеуеті жеткілікті" делінген.
Талғат Сүйінбай.
Дерек, сурет: newtimes.kz.
