Басқосуда Айдар Сайтбеков құқық қорғау органдарының қызметін жетілдіру мәселелеріне егжей-тегжей тоқталды. Сөз арасында ол қоғам алдында полиция отандастарымыздың сенімді әрі қорғаныш тірегі ретінде қабылдануы тиіс екенін атап өтті.
«Қауіпсіздікті қамтамасыз ету саласындағы мәселелерді бірлесіп анықтау және шешу үшін полицейлердің азаматтармен тиімді серіктестік қарым-қатынас орнатуы қажет. Әрбір тәртіп сақшысы антқа адал болуы керек, күнделікті жұмыста заңды қатаң ұстануы керек», деді Ішкі істер министрінің орынбасары.
Іссапар барысында өкіл Шұбаршыда қаза болған арнайы жасақ жауынгері Руслан Жолдыбаевтың атындағы кабинет ашылуына қатысты. Батырдың ерлігі мен жанқиярлығын айшықтау және мәңгі үлгі ету мақсатында өткізілген шараға Ақтөбе облысы полиция департаментінің басшылығы мен жеке құрамы, ІІО ардагерлері, облыс әкімінің орынбасары, мектеп ұжымы, батырдың отбасы – анасы, жары мен қызы, сондай-ақ оқушылардың ата-аналары қатысты.
«Қазақта «Ұлым дейтін ел болмаса, елім дейтін ұл қайдан болсын» деген қанатты сөз бар. Елім деп езіліп, жанын қиған Русланның ерлігі – бойымызда шексіз құрмет пен мақтаныш сезімін ұялатса, екінші жағынан оның қайғылы қазасы қабырғамызды қайыстырады. Ел үшін туып, ел үшін жанын қиған еріміздің есімін ұлықтау және үлгі ету мақсатында облыс әкімдігінің қолдауымен ашылып отырған бұл сыныптың өрендері болашақта еліне адал қызмет ететін азаматтар боларына сеніміміз мол», деп Ақтөбе облысы полиция департаментінің бастығы Абай Жүсіпов батырдың анасы мен отбасына қолдау сөздерін арнап, алғысхат пен гүл шоқтарын табыстады.
Ақтөбе облысы ПД арнайы мақсаттағы бөлінісінің аға инспекторы Руслан Баққалиұлы Жолдыбаев 2011 жылдың 1 шілдесінде Темір ауданында екі полиция қызметкерінің өмірін қиған қарулы діни эстремистік сипаттағы қылмыстық топпен бетпе-бет атыс кезінде жолдастарын қорғай отырып, ауыр дене жарақатын алса да, жолдастары шегінгенше атысты тоқтатпай, қандықол қылмыскерлер қолынан ерлікпен қаза тапқан. Кейін Президент Жарлығымен «Айбын» орденімен марапатталды.
«Қайсар болмыс пен антына адалдықтың айқын үлгісі болған Руслан Жолдыбаевтың ерлігі мәңгі есте. Осы мақсатта өзі оқыған Ақтөбе қаласындағы №13 орта мектепте батырдың атында алғашқы әскери дайындық сыныбы ашылып отыр. Бұл – ең алдымен, өкше басып, аға буынның ізін жалғайтын жастарға үлгі өнеге. Әрі есепсіз ерлікті тарихта қалдырудың бір тетігі», деді Ішкі істер министрінің орынбасары.
6-сыныптың 25 оқушысы тәжірибелі тәртіп сақшыларының алдында мақтанышпен әрі толқыныс сезімімен салтанатты түрде адалдық антын беріп, Руслан Жолдыбаев атындағы сыныпқа ресми түрде қабылданды. Сонымен қатар іс-шарада полиция департаментінің және №13 орта мектептің басшылығы өзара ынтымақтастық туралы меморандумға қол қойып, алдағы ауқымды жұмыстың бірлескен бағытын айқындады.
Айта кетейік, тәуелсіздік алған жылдардың ішінде елімізде Ішкі істер органдарының 817 қызметкері қызмет бабында қаза болған.
