Нысан осы жылдың желтоқсанында толығымен аяқталады. Алайда мамандардың айтуынша, көліктерге қазан айынан бастап жүруге рұқсат берілмек. Көпір құрылысы басталғанда-ақ шығыс жұрты малақайларын аспанға атып қуанған. Әсіресе аралда қалып қойғандай күй кешіп келген Марқакөл, Күршім аудандары халқының қуанышы алабөтен. Ала жаздай су бетінде қалықтап пароммен қатынасатын. Қыстың күні жандарын шүберекке түйіп, мұзбен жүретін. Мезгілдің өлара шақтарында Алтай ауданын айналып, облыс орталығына жетер еді. Қысқасы, жолдың машақатын елу жылдан астам уақыт көріп келген. Енді еліміздегі ең ұзын өткел – Бұқтырма көпірімен қатынайтын күн де алыс емес. Ұзындығы 1 316 метр болатын көпір Күршім мен Самар аудандарын байланыстырып тұр.
2019 жылдың 19 қыркүйегінде Президент Бұқтырма су қоймасынан өтетін көпір салу үшін қаражат бөлуді тапсырған. Көп ұзамай тиісті қаржы бөлініп, 2021 жылдың ақпанында нысан құрылысы басталды.
Құрылыс жұмыстары басталған соң 2022-2023 жылдары құрылыс материалдары мен жанар-жағармай бағасы қымбаттап, маңызды жобаға түзету енгізілген болатын. Сөйтіп, оның құны екі есе өсті.Екі жолақты көпірдің ені – 12,2 метр, ал биіктігі – 18 метр. Тәулігіне 80 мың көлікке дейін өтеді. Көпірдің стратегиялық маңызы зор. Ол аймақтың әлеуметтік-экономикалық дамуына ықпал етеді.
Көпір құрылысы Күршім және қайтадан құрылған Марқакөл аудандарының экономикасына барынша оң әсерін тигізбек. Айта кетейік, көпірді салу жұмыстарын толығымен отандық мердігер жүзеге асырып жатыр. Құрылысқа еліміздің бірқатар өңірінен инженерлер тартылған. Ал негізгі жұмыстар жергілікті мамандарға жүктелген.
«ҚазАвтоЖол» мекемесі облыстық филиалы директорының орынбасары Алмас Қасеновтің айтуынша, аралық құрылыстарды монтаждау жұмыстары толығымен аяқталды. 21 тірек орнатылды, оның ішінде 20-сы – негізгі тірек. 512 метрге дейін екі қабат асфальт төселген. Енді нысанның қалған бөлігін арматуралау және бетондау жұмыстарына кезек келді.
– Көпірге кіреберіс жолдар да салынып жатыр. Самар ауданында көпірге дейінгі жол учаскесінің ұзындығы 17 шақырым 200 метр болады, оның 10 шақырымына асфальттың бірінші қабаты төселген. Күршім ауданындағы учаскенің ұзындығы – 1 шақырым 300 метр, – дейді директордың орынбасары Алмас Қасенов.
Жуырда стратегиялық маңызға ие нысанды Премьер-министр Олжас Бектенов те тексеріп кетті.
– Қазір көпірдегі көлік қозғалысын іске қосу үшін жұмыстарды тезірек аяқтап, бұған барлық күшті жұмылдыру керек. Көлік-логистика саласы еліміздің экономикалық дамуының қозғаушы күштерінің біріне айналуға тиіс. Сондықтан біз осындай инфрақұрылымдық жобаларды жедел іске асыруымыз керек, – деді Олжас Бектенов.
Қос жағалаудан басталған құрылыстың қарқыны жоғары. Осылайша, Президенттің тапсырмасымен басталған ірі жоба аяқталуға жақын. Құрылыс биыл желтоқсанда халыққа толығымен қолданысқа беріледі.
Шығыс Қазақстан облысы
